Fem vil verta ny rådmann

? Ein kan sjølvsagt alltid tenkja seg å ha mange søkjarar å velja i. Men på den andre sida er det nok med ein søkjar dersom ein føler at han eller ho er den rette, seier ordførar Olav Steinar Namtvedt.
Dei fem søkjarane har kommunen fått etter at posten var gjennomgått i går. Søknadsfristen var måndag 11. september.
Tre av søkjarane har bede om at namna deira ikkje vert gjort offentleg tilgjengeleg. Det gjeld ei kvinne med adresse Bergen, ei kvinne og ein mann med adresse i Lindås kommune.
? Ønskjet om anonym behandling vil me oppfylla dersom ikkje søkjarane sjølve opnar for å gå ut med namna, seier personalkonsulent Kjetil Morken.   
Blant søkjarane er tidlegare landbrukssjef i Radøy, Eli Bjørklid, som no har eit sjølvstendig konsulentfirma i Lindås. Bjørklid har også hatt stillinga som landbruksdirektør i Buskerud fylkeskommune.
Bjørklid var landbrukssjef i Radøy frå mai 2002 til april 2004, då ho sa opp stillinga si.
Jostein Marøy har namnet sitt frå Radøy, men er busett i Fjell. Han er no rådgjevar i politisk sekretariat i ein kommune, oppgjev Kjetil Morken. Strilen har kome fram til at Marøy er tilsett i Fjell kommune.
? Når det gjeld prosessen vidare, vert søkjarlista drøfta med dei tilsette sine representantar og i formannskapet fredag, opplyser ordførar Namtvedt.
Namtvedt ser for seg ein prosess over to veker for å avklara om kommunen vil tilsetja nokon av dei fem søkjarane. Han er klar over at tida er knapp dersom kommunestyret skal føreta tilsetjing 5. oktober, slik planen er.
? Me har også henta inn tilbod på konsulenttenester til intervju og utvelging. Tilboda vert også drøfta i formannskapet fredag, opplyser ordførar Olav Steinar Namtvedt.