Femten månader for ran av postmann

Det var 6. november i år at den 26 år gamle mannen og to kameratar heiv seg over ein postmann som var ute på ruta si. Dei tre ransaka mannen og stakk av med postbilen, noko som førte til ei omfattande politijakt.
Dei to medskyldige ventar framleis på dommen for postranet, og sit no i varetekt.
Nordhordland tingrett har kome fram til at eit år og tre månader i fengsel er passande straff for postranet og dei andre tilhøva i saka. Overfallet mot postmannen og tjuveriet av postbilen vert i dommen rekna som det mest tungtvegande, men dei andre punkta ville også i seg sjølv gjeve fengselsstraff av «ikkje heilt kort varighet».

Var blakk
Då saka var oppe i retten i desember vedgjekk mannen at han var med på postranet ein månad tidlegare. Men tilståinga får berre avgrensa betydning for dommen, då forklaringane frå dei andre to uansett knytte mannen til ranet.
? Tilståinga forenkla likevel den resterande delen av saksgangen, eksempelvis ved at postbodet slapp å måtta møta som vitne og forklara seg, heiter det i dommen frå tingretten.
Om ranet heiter det at 26-åringen og kameratane var blakke, og at dei difor bestemte seg for å rana landpostbodet. Då postmannen var ute av bilen greip dei han og heldt han nede, før dei stakk av garde med postbilen. Frå bilen stal dei to mobiltelefonar, frimerke og kontantar, til ein verdi av i alt 13.500 kroner.

Knuste to bilar
Mannen er også dømt for å ha krasja to bilar på ei natt. Det var ei fredagsnatt i september at han først kjørte av vegen med sin eigen bil, og deretter stal ein annan bil som etter kvart også hamna i grøfta.
Mannen hadde i utgangspunktet ikkje førarkort, og kjøredugleiken var heller ikkje på topp sidan han hadde rusa seg på fleire ulike rusmiddel.
Dommen omfattar også fleire tilfelle av kjøp av hasj, marihuana og narkotiske tablettar.
I tillegg til fengselsstraffa er mannen dømt til å betala Posten ei erstatning på 13.500 kroner.