Fire av fem krev folkerøysting

79 prosent av dei spurde på Fedje kjenner stor grad av tilhøyrigheit til kommunen dei bur i. I Lindås er tilsvarande prosent 59. I dei andre kommunane er tala slik: Austrheim 71 prosent, Masfjorden 65, Meland 64, Gulen 63 og Radøy 62. Det går fram av meiningsmålinga  som TNS Gallup har utført for Regionrådet. Over 1200 personar er oppringde og spurte i målinga.

Undersøkinga er ledd i eit prosjekt der kommunane skal utgreia korleis det kommunale samarbeidet skal vera i åra framover, og i siste instans om ei samanslåing av ein eller fleire kommunar er aktuelt.

? Eg vart overraska over at talet i Meland ligg så høgt med så mange innflyttarar som dei har, sa lindåsordførar Tove Linnea Brandvik då undersøkinga vart presentert for lokalavisene på ein pressekonferanse i går.

Folk har også vorte spurde kor knytte dei er til regionen Nordhordland. Her svarar 62 prosent i Lindås at dei i stor grad er knytte til regionen. Berre på Fedje og i Gulen er det eit mindretal som kjenner seg sterkt knytte til regionen.

Mest positivt

Sjølv om det store fleirtalet kjenner tilknyting til eigen kommune, er både regionrådsleiar Håkon Matre og Brandvik overraska over kor positive dei spurde er til kommunalt samarbeid.  66 prosent trur at kommunesamanslåing vil ha positiv verknad både for arbeidsplassar, fagmiljø og effektiv drift av kommunane.  Men folk krev at ei samanslåing ikkje må gå ut over det kommunale tenestetilbodet.

Mest positive er folk i Gulen og minst positive folk på Fedje. På Fedje var det også ein ganske stor prosent av dei oppringde som ikkje ville svara fordi dei meinte dette ikkje vedkom dei.

Folk har ikkje fått spørsmål om kva type samanslåing dei kan tenkja seg. Difor treng den positive haldninga i Gulen ikkje  innebera støtte til ein storkommune.

Av dei spurde er menn og yngre mest positive til samanslåing, kvinner og eldre minst. Dei med høgare utdanning er meir positive enn dei med låg.

Mykje likt

? Ei side ved undersøkinga som overraskar meg, er at svara er så like frå kommune til kommune. Eg hadde venta større ulikskapar, seier Håkon Matre.

Generelt er folk i Meland, Lindås og Radøy mest positive til samanslåing, folk i Masfjorden, Austrheim og Fedje minst.

? Eg vart overraska over at folk på Radøy svara så likt folk i Lindås og Meland, seier Tove Linnea Brandvik.

Begge understrekar at denne gallupen ikkje har vore for eller mot samanslåing, men eit forsøk på å finna ut kva folk legg vekt på. Undersøkinga viser klart at folk er mest opptekne av at tenestetilbodet vert halde oppe og er nært. Kor kommuneadministrasjonen ligg, er mindre viktig.

Krev folkerøysting

Heile 81 prosent av dei spurde meiner det bør haldast folkerøysting før eit eventuelt vedtak om endring i kommunestruktur. På Fedje krev 91 prosent dette, i Lindås og Gulen 77 prosent.

? Dette talet var også litt overraskande, men eg trur kanskje det har samanheng med at folk tidlegare i utspørjinga har fått spørsmål om dei meiner det er viktig at folk får sagt si meining, seier Matre.

I tillegg til å svara på konkrete spørsmål, har dei oppringte fått koma med meir generelle utsegner i saka. Der har det kome inn over 1000 svar, men dei er førebels ikkje offentlege. Det vil dei verta seinare. Både Matre og Brandvik meiner resultatet av gallupen er eit klart signal om at diskusjonen rundt samarbeid bør gå vidare.

? Dette var i alle fall ikkje noko signal om at me skal stoppa prosessen, seier dei.

Framdriftsplanen no er at saka i løpet av våren skal presenterast på folkemøte rundt om. Også andre former for dialog med innbyggjarane skal gjennomførast. Her kan heimeside og blogg på internett vera aktuelle.

Alle kommunestyrepolitikarane i kommunane vil få eit eige spørjeskjema.

? Me ser for oss at tida fram til sommaren vert nytta til meir uformelle drøftingar, og at saka først til hausten vil koma opp i kommunestyra rundt om, seier Matre. Politisk vedtak ser dei for seg i november eller desember.

? Eg tvilar på at det me då skal stemma over, vert kommunesamanslåing eller ikkje, men ein skal aldri seia aldri. Her er mange mogelege utgangar,  seier Matre.