Fire av ti fuglar oljeskadde

Av 2000 fugl som vart observert onsdag, hadde heile 38 prosent vore i synbar kontakt med olja, skriv Kystverket.
Det var Fylkesmannen i Hordaland og medlemer av Norsk Oritologisk Forening som gjorde dette kartleggingsarbeidet. Størst er som venta skadane på fugl på Fedje. Heile 80 prosent av ærfuglane som vart talde på Fedje, var oljeskadde. Men det var og uventa høgt skadetal også i Øygarden. Det var det også på Austrheim, der dei fleste ærfuglane som vart observert var oljeskadde.
Tala som er registrerte er minimumstal. Det er inga tvil om at skadane på fugl er større etter dette forliset, enn etter Rocknes-forliset i 2004, skriv Kystverket. Den gongen rekna dei med at i overkant av 2000 sjøfugl vart råka av hendinga.

Berre sju fuglar
Fredag i eitt-tida hadde det berre kome inn sju fuglar til fuglemottaket på Fedje.
? Problemet er at det ikkje er båtar og mannskap til å samla inn fuglane, seier Karen Tvedt i Pure Wildlife, som gjerne skulle ha sett at dei både hadde båtar og folk til dette.
Dei fuglane dei har fått inn, er difor stort sett slike som folk har kome over. Under Rocknes-forliset kom dei i gang med å redda fuglar 10 dagar etter forliset. Dei fekk då inn 131 fuglar, der 62 prosent kunne sleppast ut igjen i det fri.
Tvedt reknar likevel med at innsamling vert meir effektiv i helga, då fleire frivillige har fri frå jobben. Dei ventar mellom anna ein del ornitologar ut til Fedje i helga.

World Wildlife Fund (WWF) skriv i ei melding at dei hadde håpa på at skadeomfanget på fugl hadde vore mindre som følgje av forliset, men at det ser ut til at skadane alt er store.
Sjøfuglbestanden langs kysten er alt sterkt redusert som følgje av overfiske som medfører matmangel. I tillegg fryktar WWF at både klimaendringar og miljøgifter kan medverka til denne nedgangen.
? Difor kan sjølv eit lite oljesøl, som dette jo eigentleg er, få store konsekvensar for lokale bestandar, uttalar Rasmus Hansson, generalsektratær i WWF.