Fire flate Frp-dekk

Eigaren ante fred og inga fare då bilen fredag vart parkert ved skysstasjonen i Knarvik. Men der fekk ikkje den vesle, blå el-bilen med Frp-reklamen stå i fred. Søndag fekk Hagesæter melding om at alle dekka på bilen var flate.
? Eg er overbevist om at det er ein samanheng mellom dekoren på bilen og at det vart stukke hol på dekka. Dei tok også vindaugsviskarane. Dette er ikkje vinningsforbryting, men ei handling berre for å gjera skade, seier Hagesæter oppgitt.
Kven som står bak ugjerninga, er framleis usikkert. Hagesæter seier til Strilen at hærverket er eit angrep på ytringsfridomen.
? Eg er jo ganske opprørt over at nokon kan gjera noko slikt. Ein vert litt irritert og sint når ein oppdagar slikt, seier han.
Hagesæter har no fått bytta dekk på bilen, og saka er meld til politiet.
? Og om nokon trudde dette skulle føra til at eg tar av klistremerka, har dei feilberekna fullstendig. No kjem eg i alle fall ikkje til å ta dei av, seier Hagesæter bestemt.