Fire fyllekøyrde i Meland

Du har kanskje sett den knekte lyktestolpen ved Fosse i Meland i helga? Natt til laurdag hadde politiet i Lindås og Meland det travelt med alkoholtørste bilførarar. Heile fire sjåførar blåste raudt.

Traff lyktestolpe
Den første av dei avslørte seg sjølv då han køyrde i ein lyktestolpe og i fjellveggen ved Fosse klokka 23.45 fredag kveld. Redningsmannskapa fekk mistanke om promillekøyring, noko som viste seg å stemma. Bilen den 19 år gamle mannen køyrde skal vera stolen, og mannen hadde ikkje førarkort.  
? Føraren var innom legevakta, men slapp frå det med mindre skader, seier lensmann Einar Vatne.

Unge menn
Seinare same natta fekk politiet igjen melding om ei ulukke i Meland, denne gongen i Dalesvingane. Meldinga om uhellet kom 02.45 og då politiet nådde fram til ulukkesstaden hadde sjåføren stukke av. Politiet fekk seinare fatt i ein 18 år gamal mann som er mistenkt for køyring i rusa tilstand. Medan politiet var i Dalesvingane stoppa dei også kveldens tredje sjåfør med promille.
? Det var ein 27 år gammal mann. Han hadde ikkje førarkort, og er tidlegare tatt for promillekøyring. Bilen han køyrde vart avskilta, seier Vatne.
Vel klokka tre tok politiet kveldens fjerde sjåfør som no er mistenkt for køyring i rusa tilstand. Mannen midt i tredveåra vart stoppa på Frekhaug.  
Lensmann Einar Vatne fortvilar over dei mange tilfella av fyllekøyring i helga.
? Det er skremmande å ta så mange på ei helg. Det gjev absolutt grunn til ettertanke, seier Vatne.
Han påpeikar at politiet har prioritert trafikkontrollar, og at dei kjem til å halda fram med å prioritera å ta dei som køyrer ulovleg.
? Dei må tenka på at det ikkje berre går ut over dei sjølve, men at dei lett kan involvera fleire i ulukker med slik køyring. Det er eit tankekors. Dei slepp billeg frå det sjølve, seier Vatne.