Fire redda frå brennande hus

? Ikkje gjer meg til noko helt, for det er eg ikkje. Eg gjorde berre plikta mi, seier Kjell Bjørnevoll til Strilen like etter at brannen var sløkt.
Han sat og drakk kaffi heime hjå seg sjølv då han såg mistenkeleg røyk i frå nabohuset.
? Eg såg det rauk så merkeleg, men trudde først det var pipebrann, seier han.
Han gjekk ut og sette kursen mot nabohuset for å varsla dei om pipebrannen då han brått høyrde ein smell.
? Det var nok ei rute som sprakk på grunn av varmen. Etter smellet såg eg flammane, seier han.

Sløkte brannen
Snarrådig fekk han varsla to born og to vaksne som var i huset. Ein person låg og kvilte i andre etasje. Ingen av dei oppheldt seg i rommet der brannen braut ut, og ingen hadde fått med seg flammane og røyken som spreidde seg.
? Eg fekk med meg fleire og me klarte å sløkka brannen ved hjelp av tre brannslukkingsapparat og ein hageslange, seier Bjørnevoll.
Etter at dei hadde fått temma flammene kom brannvesenet til. Også ambulanse og politi kom til staden.

Utsett for røyk
Politiet fekk melding om brannen i bustaden klokka 16.20, fortel politibetjent Glenn Våge.
? Det var fire personar i huset då brannen braut ut. Det har etter forholda gått bra med alle, men dei har fått legetilsyn fordi dei har vore utsett for røyk, seier Våge til Strilen ved den brannråka bustaden.
Årsaka til brannen kunne ikkje Våge seia noko om.
? Det må undersøkingar til før me veit sikkert kva som starta brannen, seier han.