Fire tvillingpar på SFO

– Me er einegga, seier Jonas og rappar blokka og pen­nen til Strilen for å visa at han kan skriva namnet sitt sjølv. Det er tredje skuledagen for Jonas og Markus, og både lærarar og vaksne på SFO slit med å sjå forskjell på dei to tvillingbrørne frå Gaulen.

– Eg fekk eit tips hjå mora om at Jonas har ein liten virvel i luggen og i bakhovudet, seier Frøydis Fjellsbø på SFO. Nokon andre ulikskapar har ho ikkje klart å finna så langt.

Luringar
I dag har Jonas på seg ein blåstripete genser medan broren Markus har oransje t-skorte.  Men sjølv det hjelper lite når ein ikkje ser kven som er kven. Spesielt når gutane veit utmerka godt at det ikkje tek lange tida å skifta.
Frøydis fortel at ei av dei vaksne på SFO trudde ho hadde funne løysinga første skuledagen då ho oppdaga at dei hadde ulik farge på skoa.
– No veit eg forskjellen, jubla ho. Men det skulle ho ikkje gjort høgt, for i neste augneblink hadde dei to karane bytt sko, ler Frøydis.

To par blant sju elevar
I fjerdeklassen er det to tvillingpar blant berre sju elevar. Viktor og Caroline bur i Hundvinsfeltet, og Thomas og Mikal bur i Torvena, heilt nord i skulekrinsen.
Thomas og Mikal er ikkje så like på kvarandre som Jonas og Markus. Likevel kan det vera problem å hugsa kven som er kven.
– Eg har ein diger virvel i panna og er eitt minutt eldre enn Mikal, kjem det kjapt frå Thomas.
– Eg er no ein centimeter høgare enn deg, kvitterer Mikal. Han vedgår at han har prøvd å lura folk med å ta hårgelé i luggen, men same kva han gjer, får han det ikkje til slik som Thomas.

Som hund og katt
Sjølv om det heller ikkje i Torvena er overflod av jamaldringar, ser dei to karane helst at dei slepp å leika i lag.
– Eg gidder ikkje leika med Mikal, for det er ikkje gøy, seier Thomas.
– Me likar ikkje dei same tinga, legg han til. Mikal seier ingenting, men forsvinn inn i klasserommet ved sida av. Thomas blir igjen og lurer på om det er noko anna Strilen vil vita.
– Victor og Caroline vart ni år 27. februar og me 3. august. Og vil du vita kor tid Jonas og Markus har bursdag, så vart dei seks år 16. juli. Dei hugsar ikkje datoen sjølv, skjønar du, legg han til.

Perlevenner
Andreklassen sitt tvillingpar er Stina og Sivert. Dei bur på Leivestad, ei lita grend heilt sør i skulekrinsen der det for tida heller ikkje er så mange jamaldringar. Om det er det som gjer at dei to er perlevenner, skal vera usagt. Men at dei to skal bu i lag når dei vert vaksne, er det ingen tvil om.
– Sjølv om me giftar oss med andre, så skal alle bu i eitt stort hus, seier dei to bestekompisane som ifølgje Thomas, fylte sju år i går 24. august.
Sjølv om Stina har blitt kjend med fleire på skulen, synest ho det alltid er gøyast å leika med Sivert.
– Ja, me leikar alt i lag, understrekar Sivert og hipsar søstera opp på ryggen.
– Og veit du kva, seier Stine over skuldra på broren; då me begynte i førsteklassen, trudde eg at me skulle få skrive- og leselekse med ein gong, men det gjorde me ikkje.