– Fisken er ikkje etande

– Denne fisken går i bosset, seier Torfinn Eide, fiskar og nestleiar i Kystpartiet i Hordaland.
Han er tilkalla av ein hobbyfiskar på Lindås for å vurdera dagens fangst.

Hobbyfiskaren ønskjer ikkje å stå fram med namn.

– All fisken eg fekk i dag tidleg, hadde magesekken full av oppdrettsfôr. Palen luktar ikkje pale og kjøtet er blautt, seier hobbyfiskaren.

Ein full kasse pale og nokre makrell er ikkje etande. Han har spart nokre eksemplar med innvolar i frysaren for å visa fram. Magesekkane er godt fylte med brun «gugge» som fiskarane meiner er oppdrettsfôr.

Skal auka kapasiteten
Fiskarane meiner det skuldast avfall frå Fyllingsnes Fisk AS sitt matfiskanlegg ved Langøy.

Dei to fiskarane legg ikkje skjul på at dei helst skulle sett at heile anlegget forsvann, men dei er ekstra fortvila fordi Hordaland fylkeskommune har gitt løyve til at kapasiteten kan aukast frå 2340 maksimaltonn biomasse (mtb) fordelt på to lokalitetar, Ospneset (1560 mtb) og Langøy (780 mtb), til ein maksimal biomasse på 3120 tonn ved Langøy. Søknaden er oversend Fiskeridirektoratet for handsaming.

Bekymra for forureining
Det er forbode å fiska nærare enn 100 meter frå eit oppdrettsanlegg, men hobbyfiskaren skal ikkje vore nærare enn 400 meter frå oppdrettsanlegget ved Langøy då han fiska fisken.

– Heile fjorden er full av avfall frå anlegget, seier Eide.

– Og no har dei fått lov til å auka kapasiteten, så om det er gale no, så vert det verre, seier han.

Fiskaren og politikaren har tidlegare sjølv vore med på avgjerder om å flytta oppdrettsanlegg frå grunna ut på djupt vatn, men meiner no at dette var feil å gjera.

– Når dei står på djupt vatn, så vert avfallet spreidd over eit større område fordi straumen fører han med seg over lengre avstandar, seier Eide.

– Her vert skiten dregen utover i seks timar, så innover i seks timar, heile døgeret med tidevatnet. Avfallet strekkjer seg derfor langt utanfor området under oppdrettsanlegget, legg hobbyfiskaren frå Lindås til.