Fjernvarme utan isbane

– Vårt parti utelukkar ikkje ei framtidig skøyte­bane i Knarvik, men i ein første fase vil det ikkje verta ei hovudkjelde for fjernvarme, kom­menterte KrF sin gruppe­leiar Arne R. Ramslien etter ved­taket om val av varmekjelde ved fjernvarme i Knarvik.

Ulik tolking
Ramslien utdjupa dette med å visa til at om skøytebane skulle vera ei varmekjelde, måtte kommunen og ha funne plass til nye millioninvesteringar i sin økonomiplan.

I kommunestyret torsdag opp­levde Ramslien at hans gruppe delte seg i to leirar ved avrøystinga.

– Gruppa var samde om å dela seg, ut frå at me hadde ulik tolking av korleis ordlyden i to ulike framlegg skulle tolkast i høve til ei skøytebane, forklarte Ramslien.

Bio-siger til Høgre
Den eine KrF-fløyen støtta eit framlegg frå Ståle Hauge i Ap om å vidareføra kommunen sin plan om etablering av «fjernvarme­nett i Knarvik basert på fornybar energi». Men med røystene til Ap og Frp fekk framlegget berre 15 av 31 røyster og fall.

Leif Sleire i Høgre føreslo å erstatta ordet fjernvarme med bioenergi, ein ordlyd som fekk 16 røyster frå H, Sp, Venstre og KrF.

Bjarte Vanøy (Frp) førslo å seia Ja til isbane som varmekjelde for fjernvarme i Knarvik. «Infrastrukturen og ulike organi­ser­ingar av rørtrase og drift skal administrasjonen visa når saka om realiseringa av anlegget vert lagt fram for politisk handsaming», heiter det vidare i fram­legget, men den fekk berre Frp sine fem røyster.

Fleirtalet sitt vedtak inneber at aktuelle tilbydarar av varme frå bioenergi skal kartleggjast, og det skal hentast inn tilbod på pris for ferdig levert varme til kommunale og fylkeskommunale bygg.