Flatøy-plan tek tid

Kommunen prøver å halda oppe tempoet i planlegginga, seier ordførar Solbjørg Åmdal Sandvik. Ho leiar arbeidsgruppa som jobbar med ny arealdisponering på uutnytta delar av Flatøy. Ordføraren viser til at det er mange aktørar på bana, også Statens Vegvesen.

Det er Tore Jensen i konsulentselskapet Opus som er beden om ei skisse inkludert hotell og bustader i Midtmarka.
Drøftinga er no utsett i fire veker til 15. februar, opplyser ordføraren.
Det er eit større fjordhotell som er aktuelt i Midtmarka. Grunneigarrepresentant Are Nygård har stadfesta at ein internasjonal kjede alt har vore på synfaring og vist sterk interesse for ei aktuell tomt.

Ein annan kjede har også vist interesse. Fleire hundre bustadtomter kan også inngå i ei utbygging. Så langt har vegvesenet klare krav om ei omfattande og kostbar avkøyring frå E39 dersom området skal byggjast ut. Torsdag kom det fram i Strilen at Walde Byggevare vurderer etablering at sitt nye byggsenter med lager, butikk og kontor i Knarvik. Ein grunn til dette er at planarbeidet på Flatøy, der Walde har ønskt å etablera seg, kan ta for lang tid. Verksemda med 55 tilsette slit i dag med altfor små lokale på Holme.

? I Meland kommune var me orienterte om at Walde også vurderer å flytta til Knarvik, seier ordføraren. Ho håpar at ein plan, inkludert den aktuelle tomta til Walde si etablering på Flatøy, kan vera klar i løpet av 2006. ? Når det gjeld til dømes kloakkløysing, trur eg ikkje det treng skapa problem. Men Meland kommune må ta den tida som trengst. Arealbruken på Flatøy er for viktig til å ha hast-verk. Utnyttinga må vurderast grundig. Og me må sjå arealet på begge sider av E39 i samanheng, seier ordføraren.
? Trengst det ei større utbygging for å dekka inn kostnader med ei trafikkløysing?
? E39 er ein riksveg. Så mitt utgangspunkt er sjølvsagt at staten tek kostnaden med ei avkøyring. Men er det snakk om høge kostnader utanom stamvegen, kan det fordra eit visst kvantum av utbygging, seier Åmdal Sandvik.