Flåttbitt endra livet for Floen

? Han er ein ondskapsfull rakkar, den flåtten, seier Ragnar Floen (60).
Frustrert og oppgitt fortel Floen om då han på ein ferietur til Gran Canaria la merke til ein stor, raud ring på baksida av kneet.
? Eg trudde eg hadde fått merket på flyturen ned. Det klødde, men forsvann før eg kom heim att, og eg gløymde heile merket, seier Floen.
To månader før hadde han fjerna ein flått frå same plassen bak kneet, men han tenkte ikkje over at det kunne vera noko samanheng med den raude ringen før seinare.
Ut på vinteren byrja Floen å verka i kroppen. Muskelsmerter heldt han vaken om natta, og han byrja å tøya og strekkja for å motverka smertene.
? Har eg vorte gammal no, hugsar eg at eg tenkte. Eg var 56 år då. Etter ei stund tok eg ein del blodprøvar og testar på Haukeland, og då fekk eg svaret. Frå flåtten hadde eg fått Borreliainfeksjon, fortel Floen.

Går framleis tur
Bakteriegruppa Borrelia er den vanlegaste smitten frå flått. Den kan invadera hjernesystemet og gje lammingar, leddsjukdomar, kronisk hudsjukdom og smertetilstandar.
? Eg fekk muskelsmerter, nyresmerter og underlivssmerter, men kuren mot borreliainfeksjonen hjelpte, seier Floen.
Året etter fekk Ragnar Floen på ny kjenna etterverknadane av bitet.
Han fekk ein ny kur, og nekta å la seg stoppa av smertene.
? Eg kan jo ikkje leggja meg ned og ikkje gjera noko, seier mannen som er ein av dei ivrigaste turgåarane på den grøne øya.
? Eg lærte å kle meg på ein annan måte. Lang bukse og skjorta godt ned i buksa hjelper godt, slik at flåtten ikkje slepp til. Eg har også lært at flåtten berre kan gå oppover, og eg veit kvar den likar seg. Flåtten skal ikkje styra kva eg skal gjera, seier Floen.
Floen har berre fått eitt bit etter at han vart observant på dei endringane han måtte gjera.

Hjerneinfarkt
Det siste året har endå ein sjukdom meldt seg hjå den turglade mannen. På ein tre-fire timars tur ved Lometjødna i Haukåsen mista han heilt kontroll over seg sjølv.
? Eg hugsa ingenting, og hadde gått i to timar utan å vita kvar eg var. Hadde eg ikkje sett skiltet til Austebygd skule, hadde eg ikkje visst at eg var på Sletta, fortel Floen.
Legane meinte først han hadde eit lite hukommelsestap. Testar viste at han hadde hatt eit hjerneinfarkt.
? Eg dett framleis vekk i minuttar om gangen, og det hender eg mister synet. Først fekk eg blodfortynnande middel mot dette, men det verka ikkje. Då eg fekk Borrelia-kuren, vart eg betre, seier Floen, som meiner dette viser at Borreliabakterien har noko med anfalla å gjera.

Kle deg godt
Floen vil gjerne åtvara andre mot denne blodsugande midden, og håpar fleire vil verta merksame på kor farleg den kan vera, når han no fortel si historie om den farlege smitten.
? Korleis har dette bitet merka livet ditt?
? Korleis merkar våkenetter med muskelsmerter eit menneske? Kva gjer det med eit menneske å mista hugsen? Korleis merkar det eit menneske at ein må opererast, testast og ta medisinar? svarar Floen.
Han oppmodar folk på det sterkaste å dekka seg til når dei går i skog og mark.
? Det er betre å bruka litt tid å kle på seg riktig, enn å få flåttbitt og ha smerter både dag og natt, seier Floen, og understrekar kor viktig det er å fjerna flåtten så snart som mogleg om du får ein på deg.
? Du kan og eta kvitlauk, for det skal og hjelpa førebyggjande. Om det går så langt at du ser ein raud ring rundt bittet, må du kontakta lege snarast, rådar Floen.