Flaumskadar for millionar

Lensmann Henry Ind-rebø og dei oppnemnde takstmennene har sett på skadane, og konklusjonen er klar:
? Dei største enkeltsakene kjem opp i skadar på over ein million kroner, seier Indrebø.
I alt var det meldt inn over 50 tilfelle av naturskadar, men nokre få har falle bort fordi erstatningssummen vert under 10.000 kroner. Det er grensa for eigendelen.
Gulen var den kommunen i vårt distrikt som fekk flest skadar. Det vart skadar både på vegar, bruer og dyrka mark, og elveleie vart fylte opp med stein og grus.

Mykje arbeid
? Me er enno ikkje heilt ferdige med å skriva ut sakene, fortel Indrebø.
Arbeidet har trekt i langdrag fordi det har vore lite folk på lensmannskontoret, og ein har ikkje fått tilført ekstra ressursar for å gjennomføra takstane. Dette har ein måtta gjera ved sida av det ordinære arbeidet.
? Men eg har snakka med kontor som ligg lenger bak enn oss, seier Indrebø.

Millionar
Lensmannen har ikkje summert kor store erstatningar det totalt vil vera snakk om i Gulen, men det dreiar seg om fleire millionar. Summane fordeler seg over heile spekteret.
Det er Naturskadefondet som betalar ut erstatningane. Skadar på hus og tun, som vert dekka av anna forsikring, kjem ikkje inn under denne erstatningsordninga.