Fleirtal for to bommar

Sjølv om ein bom på Kalneset ikkje gjev så myke pengar i kassen, må han til både for å få bompengepakken gjennom i kommunestyra i Lindås og Meland, og for å få prosjektet godkjent i Statens vegvesen og fylkeskommunen.
Det meinte eit klart fleirtal då styret i Regionrådet, som er samansett av ordførarane i dei sju medlemskommunane, hadde møte i dag, tysdag.
Berre radøyordførar Olav Steinar Namtvedt reserverte seg mot bom nummer to, på Radøygrensa, og viste til drøftinga i formannskapet på Radøy førre veke, der det kom klare signal om at ein bom på Kalneset var lite populær.
Fedje-ordførar Erling Walderhaug var ikkje til stades på møtet.

Alt eller ingenting
I styret kom det klart fram at dei andre ordførarane var litt forundra over debatten som hadde oppstått på Radøy.
? Men det er ikkje nye tonar. Det er akkurat den same diskusjonen som me har hatt i Lindås. Men spørsmålet er: Ønskjer me desse vegprosjekta så sterkt at me er villige til å ta ulempene med å betala bompengar. Gjer med det ikkje, kan me berre leggja vekk heile Nordhordlandspakken. Ingen ønskjer bompengar, sjølv  om enkelte ser ut til å tru det, sa Tove Linnea Brandvik, ordførar i Lindås.

Mot Knarvik
? Det er klart at søre delen av Radøy orienterer seg mot Knarvik i alle samanhengar. Dei er sjeldan på Manger. Difor er det vanskeleg å argumentera for ein bom til ein veg som mange ikkje vil få særleg nytte av, sa Namtvedt og tenkte på veganlegget Tolleshaug - Soltveit. Dette anlegget er det største prosjektet i fase 1 av Nordhordlandspakken, og det er argumentet for at det bør vera bom på Radøy i tillegg til ved Nordhordlandsbrua
Dei andre i rådet meinte at viss ein skal sitja og finrekna på kven som har nytte av bompengane, vil ein aldri koma nokon veg.
? For meg kunne det gjerne vera ein bom, men viss to bommar må til for å få prosjektet gjennom, godtek eg det og, sa Austrheim-ordførar Ole Lysø.

Ta ut Radøy
? Viss det er slik at det ikkje er så viktig å få utbetra vegane i kommunen at dei er villige til å betala bompengar, kan me laga ein Nordhordlandspakke utan vegprosjekta på Radøy, sa Brandvik, men det framlegget vart ikkje drøfta nærare.
I Nordhordlandspakken fase 1 ligg det inne 70 millionar kroner til mindre prosjekt i Lindås og Meland. På møtet kom det fram at Meland ønskjer å bruka desse  på Rv 564 frå Fløksand til Åsebø, medan Lindås vil bruka mesteparten til trafikksikring i Alverstraumen-Remme.
Saka går no til representantskapen i Regionrådet. Dei skal ha møte neste tysdag og avgjera om ein skal gå vidare med arbeidet med Nordhordlandspakken eller ikkje. I representantskapen sit lokalpolitikarar frå alle medlemskommunane, men ordførarane er ikkje med. Dei folkerike kommunane har fleire medlemer enn dei små.