Fleirtal i Regionrådet inn for å laga bompengesøknad

? Saka burde ikkje vore tatt opp i dag! uttalte ein litt fortørna Meland-ordførar etter at ho kom til Regionrådet sitt møte like før klokka ti måndag. Åtte minuttar tidlegare hadde Håkon Matre (Masfjorden), Ole Lysø (Austrheim), Knut Moe (Modalen) og Olav Steinar Namtvedt (Radøy) støtta det nye opplegget for ein ny vegpakke.
Dei som ikkje kunne stilla, var Erling Walderhaug frå Fedje og Tove Linnea Brandvik frå Lindås i tillegg til Åmdal Sandvik frå Meland.
Regionrådet var likevel vedtaksført, og vedtaket er ei tilråding om at det vert utarbeidd ein bompengesøknad for fase I av Nordhordlandspakken, basert på to bomstasjonar, ein ved Nordhordlandsbrua og ein ved Lunde på Radøy.
Dette er den siste løysinga som samferdselsutvalet til Regionrådet, Håkon Matre, Tove Linnea Brandvik og Olav Steinar Namtvedt, har gått inn på.
I Regionrådet i går gjentok Namtvedt det han førre veke har sagt til Strilen:
? Eg har bestemt meg, innforstått at Namtvedt meiner Radøy bør fira på standpunktet om å gå mot ein bomstasjon i sin kommune. Hadde Brandvik vore på møtet i går, må ein gå ut frå at ho ville støtta framlegget ho har forfatta saman med Matre og Namtvedt. Walderhaug ville truleg også ha støtta framlegget på vegner av Fedje. Dermed tyder mykje på at Meland vert den kommunen der eit fleirtal vil ha reservasjonar mot det siste framlegget.
Før saka går til den enkelte kommune, skal ho opp i Regionrådet sin representantskap kring 1. juni.
Meland-ordføraren viste måndag Strilen eit framlegg med litt annan ordlyd enn det som vart vedteke, men det fekk ho ikkje sjansen til å argumentera for.