Fleirtal tilrår skytebaneplan

Utvalet hadde møte førre torsdag. Kommunestyret avgjer saka på kommunestyret 7. november. Dei fire som røysta for godkjenning av reguleringsplanen var Astrid Nordanger (Ap), Lena Bø Nilsen (FrP), Audun Sylta (H) og Jan Tore Hvidsten (H) . Bjørg Skarbø (Sp), Oddmund Skjelvik (Sp) og Tore Hamre (FrP) røysta mot.

Eit dilemma
Politikarane sitt dilemma i denne saka, er at dersom kommunestyret godkjenner reguleringsplanen kan skytarlaget oreigna grunn til skytebana.
Det er ein rett Stortinget har gjeve det frivillige skyttarvesenet. Haldninga til ein del politikarar har vore at dei er for skytebane, men i mot oreigning.
Radøy skyttarlag har for eit par år sidan gjort styrevedtak om at dei ikkje vil oreigna grunn til bana. På møtet torsdag vart det uttrykt ønskje om at skyttarlaget skulle koma med eit juridisk bindande dokument, der dei garanterte at dei ikkje ville gå til oreigning.
? Etter råd frå DFS (Det frivillige skyttervesen), vil me av prinsipielle grunnar ikkje gjera det, seier nestleiar Andre Michelsen i Radøy skyttarlag.
Årsaka er at Stortinget har gjeve skyttarvesenet denne retten, og at dei difor ikkje vil tukla med det. Men Michelsen oppmodar politikarane til å stola på at dei vil halda seg til styrevedtaket.
Han seier samstundes at utan godkjenning av reguleringsplanen, vert det ikkje tilbod om skyting på Radøy i framtida.

Prøveskyting
Rådmannen rådde i si innstilling politikarane til å seia nei til reguleringsplanen, då grunneigarane fram til no har gjeve uttrykk for at dei ikkje vil selja frivillig.
Saka vart utsett på førre planutvalsmøte og det vart deretter gjennomført ei synfaring. Då vart det og gjennomført prøveskyting. Denne viste at det vert lite støy som når fram til busetnadene i nærleiken.
Men politikarane sitt dilemma vert ikkje mindre av den grunn, då motstanden mot skytebana er stor i området. Dette gjeld ikkje berre at eit positivt vedtak kan utløysa oreigning. Grunneigarar som ikkje eig grunn der skytebana skal koma, men som kjem innanfor støysona, er negative til at skytebana vil vera med og avgrensa utnytting av deira område. Ein del uttrykkjer dessutan frykt for negative verknader for friluftslivet.