Flest skilsmisser i Meland

Meland toppar altså skilsmissestatistikken i fylket i fjor, som dei var det året før. Det var 3,2 skilsmisser per 1000 innbyggjar i Meland i fjor. Fjell kommune kjem etter med 2,4 skilsmisser per 1000 innbyggjar. Lindås ligg også på denne lista, med 1,7 skilsmisser per 1000 innbyggjar. Masfjorden kommune var den einaste kommunen i Hordaland utan skilsmisser i fjor, men det var meldt om seks separasjonar. Statistikken finn ein på fylkeskommunen sine nettsider.

Kyrkja tek initiativ
Sjølv om Meland toppar statistikken klart, var det endå fleire skilsmisser i kommunen i 2005, 22 mot 19 i fjor. I fjor var det elles berre Lindås og Meland av nordhordlandskommunane som var blant dei ti kommunane med flest skilsmisser per 1000 innbyggjar. I 2005 var også Austrheim kommune med på denne lista.
? Eg synest dette er veldig bekymringsfullt. Ein veit det er mykje vondt som skjuler seg bak ei skilsmisse, både for born og vaksne, seier sokneprest Sverre Langeland i Meland.
Han kjem til å ta eit initiativ overfor kommunen, slik at dei kan setja seg ned saman og sjå på kva dei kan gjera for å styrkja familiane.

Ung befolkning
? Det høge talet på skilsmisser er ei utfordring for både kyrkja og andre gode krefter i kommunen, seier Langeland, som ikkje kan seia sikkert kva som er årsaka til dei høge skilsmissetala. Men han trur at det kan ha noko med at befolkninga er ung i Meland, det er stor tilflytting og mange som er i etableringsfasen. Tidlegare tal har vist at talet på skilsmisser er høgast blant dei yngre para.
Fylkesmannen i Hordaland innvilga 950 skilsmisser i fjor. Dette er 23 fleire enn året før og ein auke på 4,4 prosent. Dei fordeler seg med 942 skilsmisser frå ekteskap og åtte frå partnarskap. I alt 54 prosent av skilsmissene i Hordaland i 2006 vart registerte i Bergen, mot 55 prosent året før.