Flygel til Masfjorden

? Det var litt tilfeldig at Masfjorden vart neste kommune i rekkja, seier Inger Johanne Ekvedt til Strilen.
Det var i september ho kontakta Masfjorden kommune og opplyste at ho har tenkt å gje eit instrument til alle kommunane i Nordhordland. I oktober var representantar frå kyrkjeleg fellesråd i kommunen i Bergen Pianoforretning saman med Ektvedt for å prøvespela instrument, og då enda det opp med at det vart eit flygel.
? Det er litt rart. Når eg køyrer gjennom den første tunnelen på sørsida, forsvinn den nøkterne strilen i meg, seier Ekvedt.

Sandnes
Etter ei vurdering av kor instrumentet skulle plasserast, bestemte ein seg for Sandnes kyrkje sidan dette er det beste og mest nytta konsertlokalet i kommunen. Og tysdag denne veka var altså instrumentet på plass.
? Eg stiller krav om at flygelet skal stellast skikkeleg med, og det har dei lova, seier Ektvedt.
Instrumentet skal innviast under nyttårskonserten fredag 30. desember. Då vil gjevaren sjølv vera ein av utøvarane, saman med pianist Rune Alver. Som grunngjeving for gåva seier Inger Johanne Ektvedt at ho ønskjer å dela verdiane ho fekk av salet av apoteket i Knarvik med dei som har vore kundar i apoteket. Og musikk er noko som mange kan ta del i og gleda seg over. I tillegg er Ektvedt sjølv ein stor musikkentusiast.

Vurdera
Ho har tidlegare gjeve piano til Nordgardsløa på Frekhaug og flygel til Musikkhuset i Knarvik. Ekvedt seier at planane for neste instrumentgåve ikkje er klare, og at det ikkje treng verta eit flygel neste gong.
? Eg må ha pengar til dette og, seier ho.
Men i løpet av 2006 reknar ho med at også Radøy, Fedje og Austrheim har fått sitt instrument.