Flyshow og amerikanske bilar på Knarvik-kaien

– Det er berre heilt fantastisk. Det er slik at du ikkje trur det er sant, seier Glenn Tangen, Ove Myking og Håvard Dale.

Og dei tullar ikkje.
Søndag 10. juni kjem Forsvaret til Knarvik med eit F16 jagarfly og Hercules transportfly. I tillegg kjem det ei rekkje aktørar med oppvisningsfly. Det skal blant anna koma ein Pitts Python, ein Pitts S2A og ein jet. Alle flya skal fly oppvisning over Knarvik og Osterfjorden. Og som om ikkje det var nok, er det venta at godt over 100 amerikanske bilar skal stå på utstilling på ferjekaien.

– Me tar inn så mange amerikanske bilar me klarer å få plass til på kaien. Kor mange det er, veit me ikkje enno, men det kan bli så mykje som 150 stykk, seier Glenn Tangen i Amcar Nordhordland.

I fjor arrangerte den lokale klubben Amcar treff for første gong på ein god del år. Det vart så vellukka at dei bestemte seg for å arrangera eit nytt i år.

– Me hadde eigentleg tenkt å arrangera eit treff berre for Amcar, men så balla det på seg etterkvart, flirer Tangen.

Forsvaret 100 år
Nordhordland flyklubb ville vera med og laga ein dag for alle som er interesserte i luftsport. Håvard Dale i flyklubben nytta det han hadde av kontaktar i miljøet og var frimodig nok til å spørja Forsvaret om ikkje dei kunne tenkja seg å stilla med nokre fly.

– Forsvaret fyller 100 år i år. I samband med jubileet reiser dei rundt og held flyoppvisningar fleire stader i landet. Dei har eit travelt program og hadde eigentleg ikkje tenkt seg til Bergens-området, men eg tenkte det var verd forsøket, seier Dale.

I mellomkrigsåra hadde ma­rinens sjøflyvåpen ein base på Flatøy. Det er den historiske tilknytinga, som gjer at Forsvaret har funne ut at dei kan leggja inn eit besøk i Nordhordland.

– Ein unik sjanse
– Å få Forsvaret til Knarvik for å fly oppvisning er stort. Kjempe­stort. Noko slikt har aldri skjedd før og det kjem neppe til å skje igjen, seier Dale.

Arrangementet i Knarvik har fått namnet «Wings and Wheels» og vil gå føre seg på ferjekaien. Amcar Nordhordland og Nordhordland flyklubb står som arrangør og dei ventar mykje folk.

– Dette er ei oppleving som ikkje berre vil trekkja folk frå distriktet vårt, men frå eit stort område, seier Tangen og Myking.

Dersom det vert ein suksess, ønskjer dei to klubbane å samarbeida om eit liknande arrangement neste år.

Båtar og demotur med sjøfly
– Me arrangerer denne dagen for å setja fokus på alle typar luftsport og motorsport. Me vil visa fram det som er av slikt i distriktet vårt, seier arrangørane.

Responsen frå lokale lag og personar med interesse i den retninga, har vore stor.

– Me har invitert alle me kan koma på som driv med tøffe ting med motor. Mange lag og grupper kjem til å ha stand på kaien for å fortelja om det dei driv på med. Me har invitert folk som driv med autoslalåm, folk frå luftsportsmiljøet i Gulen, og Hobbyboat, berre for å nemna nokon. Hobbyboat stiller med ein masse båtar og skal ha utstilling både på land og på sjøen.

Dersom forholda ligg til rette for det, blir det også bli fallskjermhopp og demonstrasjonsturar med sjøfly. Nordhordland flyklubb vil stilla med sjøfly og vil fly demoturar som folk kan få vera med på, seier Dale.

Det vert også modellfly og hoppeslott, som den yngre garde nok vil setja stor pris på. I tillegg vil det bli sal av diverse i bodar på kaien.

– For heile familien
– Dette skal vera ein dag der heile familien kan gå saman, seier arrangørane. Medlemmar i flyklubben og Amcarklubben gjer heile jobben på dugnad, men det kostar ein del å arrangera ein slik dag, så dei tek litt inngangspengar.

– Men det skal ikkje kosta meir enn at alle skal ha råd til det, og me gjev familierabatt, lovar dei.

Lokalt næringsliv og Lindås kommune har også vore med og bidrege med pengar som gjer det muleg å få dette til. No håpar berre arrangørane at vêrgudane vil vera med på laget.

– Dette må jo berre bli ein drau­me­dag, seier gjengen til avisa.