Første skjering på fastlandssambandet

Fivelsdal er ikkje så stille og fredleg som bygda lenge har vore. Det durar av boremaskiner, dundrar av sprengingar og skramlar av stor gravemaskiner som flytter digre steinar. Arbeidet med fastlandsambandet til ytre Gulen er i gang.
Fem-seks mann frå Birkeland Entreprenørforretning i Sløvåg er i full sving med å sprengja ut ei høg skjering. I vel ei veke har dei arbeidd på det nye fastlandssambandet over Brandangersundet.
? Me kjem til å ha fleire folk her etter kvart, fortel Helge Birkeland til Strilen.

Begge sider
Birkeland Entreprenørforretning har fått anbodet på å byggja veg frå Fivelsdal og ut til brufestet på fastlandssida. Det omfattar også ei fylling i sjø.
Same firma skal også byggja vegen frå brufestet og eit stykke inn på land Sandøy. Dette vil til dels pågå samstundes.
Birkeland Entreprenørforretning har frist til våren med å vera ferdig med sin del av arbeidet.

To år fram
På grunn av løyvingane frå fylkeskommunen er framdriftsplanen for sambandet ganske lang, og veg og bru skal ikkje opnast før rundt jul i 2008.
? Ved juletider vil anboda for vegen frå Sløvåg og vegen frå Ånneland til brufestet på Sandøy verta utlyst, seier prosjektleiar Aril Hanekamhaug i Statens vegvesen til Strilen. Om dette vert eitt eller to anbod, er ikkje bestemt. Først neste sommar vil anbodet for brua over Brandangersundet verta utlyst. Den skal monterast sommaren 2008.

Ikkje forseinka
NRK Sogn og Fjordane hadde tysdag eit oppslag om at ein ikkje greidde å bruka opp midlane som var avsette til fylkesvegar i 2006, og at dette kunne ha forseinka fastlandsambandet i Gulen. ? Dette er berre tull. Me vil stort sett bruka opp våre pengar i år. Det er løyvingane for dei neste åra som bestemmer kor fort me kan byggja, seier Hanekamhaug.

Ikkje to køyrebanar
Brua over Brandangersundet skal vera så brei at ein trailer og ein personbil kan passera kvarandre.
? Skulle det vore to fulle køyrebanar, ville brua vorte ti prosent dyrare, og det er det ikkje trafikk til, seier prosjektleiaren.
Når det gjeld budsjettet på 125 millionar kroner, burde det halda.
? Det einaste som kan sprengja det, er at tidene for entreprenørane er så gode at det vil pressa opp prisane, seier han.