Fortvilande ruteknusing

- Det er fortvilande og irriterande at nokon kan gjera slikt. Me vert litt urolege, seier Gro Fyllingsnes og Cato Danielsen.
Dei eig gamleskulen og har lagt svært mykje tid og pengar i å setja det 117 år gamle bygget i stand. Dei har arbeidd med å laga veggar, bytta tak, skifta ruter og gjera bygget mest muleg identisk med slik det var då det vart oppført.
- Me trur bygdefolket set pris på at me tar vare på bygget, så det er veldig synd at slikt skjer, seier Fyllingsnes fortvila.

Ukjende gjerningsmenn
Sidan 17.mai i fjor har heile ti ruter blitt knuste på det gamle skulebygget.
- Me skifta fleire ruter i vinter, og no har nokon altså vore på ferde igjen.
Det må ha skjedd i førre veke, seier Fyllingsnes. Å skifta vindauge er den verste jobben i følgje eigarane. I og med at dei prøver å bevara det originale, vil dei ikkje bytta ut vindauga heilt, og har brukt mykje tid på tilpassa delar til originalvindauga.
Dei anar ikkje kven som kan stå bak ugjerningane, men trur kanskje det må vera barnestrekar frå ungar i nærmiljøet.
- Dei veit kanskje ikkje at det er i privat eige, og at det er mykje jobb med å halda i stand, seier Danielsen.

Føl med
Huset har fått stå i fred i 13 år, utan noko form for hærverk. Det er først det siste året at eigarane har måtta slita med øydeleggingane.
Dei reknar med at verdiar for over 10.000 kroner er øydelagde.
- Me vil gjerne at foreldra føl med borna sine, og at folk gjev melding dersom dei ser noko. Aller mest ønskjer me at det ikkje skjer igjen, sjølvsagt, seier dei.
Bygget vart brukt som skulehus fram til 1952 og som sløydsal til slutten av 60-talet. No er huset privateigd, og har ikkje vore aktivt i bruk dei siste åra. Men om somrane har det fungert både som galleri og som undervisningsrom. Neste veke skal Gro stilla ut sine eigne ikon der.
- Me kjem til å vera her ein del i sommar, og håpar nesten me er her om det skjer igjen, seier dei.