Fortvilar over nei til kunstgras

Saka handlar om å byggja om grusbana i Knarvik til kunstgras, eit prosjekt til mellom 4,5 og 5 millionar kroner. NBK tilbyr seg å betala ein million kroner i kontantar og låna resten av beløpet. Mykje av dette vil dei på sikt få tilbake som tippemidlar. Det einaste klubben treng i følgje NBK-leiar Tore Kvalvik, er løyve frå baneeigaren Lindås kommune og at kommunen står som utbyggjar.

? Står kommunen som utbyggjar får ein refundert momsen. Det får ikkje NBK, og dermed vert prosjektet dyrare dersom klubben står som utbyggjar, seier Kvalvik.

Negativt i kommunen

Rådmannen kom med negativ innstilling til prosjektet, og levekårsutvalet støtta rådmannen i dette på eit møte tysdag. NBK skriv at dei 100.000 kronene kommunen betalar for leige av lokale i klubbhuset til NBK, er nok til å dekka lånet klubben må ta opp i samband med utbygginga. Kommunen viser til at denne inntekta er avhengig av at kommunen held fram dette leigeforholdet utover avtala tid ? altså at inntekta er usikker. Dei velgjer difor å sjå på denne utbygginga som «eit kommunalt tiltak med ei viss mogleg ekstern medfinansiering». Dette vil då gå utover den økonomiske ramma kommunen arbeider innanfor dei nærmaste åra, meiner rådmannen.

Levekårsutvalet kjem med råd overfor formannskapet som har saka oppe i dag. Formannskapet kjem så med innstilling til kommunestyret.

Skuffa over kommunen

? Me er ikkje avhengige av dei 100.000 kronene for å dekka lånet. Det er berre påpeikt i vårt innspel. Eg hadde håpt på at kommunen var meir villig til å gå inn i ein skikkeleg dialog med oss på førehand, før dei kom med denne negative konklusjonen, seier Kvalvik.

Han føler at kommunen sin tillit til klubben er liten, sidan dei ikkje har tru på at dei skal kunna klara sine plikter i høve lånet på bana. NBK har likevel ikkje gjeve opp. Kvalvik seier at dei har vore i kontakt med politikarar som har vore positive til dette prosjektet. Han håpar at formannskapet kjem til ein annan konklusjon på møtet i dag, torsdag.

Prekært for klubben

Banetilhøva i NBK vert i følgje Kvalvik heilt prekære neste år, dersom dei ikkje får kunstgrasbana på plass. I årets sesong har dei måtta leiga seg inn på baner i Meland og på Osteriedet. I år har situasjonen vore ekstra ille sidan grasbana har vore i så dårleg stand på grunn av veret og dårleg vedlikehald. Frustrasjonen har difor vore stor i klubben. Dersom ein ikkje får på plass den planlagde kunstgrasbana til sesongstart, må NBK gå til Fotballforbundet og be om hjelp, seier Kvalvik.