Fossemyra vert drenert

Formannskapet vedtok onsdag 22. februar å forskottera 221.000 kroner til drenering av idrettsanlegget. Dermed kan det leggjast eit nytt røyr på kring seksti meters lengde i jorda.

? Me forskotterer, men det er rett og rimeleg at partane delar på kostnaden, seier Meland-ordførar Solbjørg Åmdal Sandvik.

Det inneber at kommunen vil ha Kvernbit IL med på spleiselag. Idrettslaget er ansvarleg for fotballbanene, og er dessutan sentral i fleirbrukshallen der. Også Statens vegvesen, som eig det eksisterande røyret, vert bedne om pengar.

Det siste halvåret har det tre gonger flauma over på idrettsbanene på Fossemyra. Når det regnar kraftig, er dreneringa underdimensjonert. Dagens røyr har ein diameter på åtti centimeter heilt øvst, og seksti centimeter resten av vegen. Det nye røyret vert ein meter i diameter. Slik håpar ein å unngå flaum som kan skada kunstgraset.

Meteorologane ventar seg fleire periodar med ekstremt regnver i åra som kjem. Men nytt dreneringsrøyr skal kunna ta unna store mengder regn på Fossemyra.