Fotballsommar for Matias

Sportsklubben Brann tok med seg dei største fotballtalenta i Hordaland til Jet-cup på Hamar førre veke. Med på laget var Matias Møvik frå Stranda.
? Det var heilt greitt å spela i Brann-drakt, seier Møvik, som har tilbod om å byrja i Brann alt i haust. Han er ikkje heilt sikker på om han vert i Eikanger ut sesongen.
? Eg har tilbod frå Brann og Åsane. Det vert vel å trena med a-laget, og spela kamp med andrelaget om eg vel Brann, seier sekstenåringen.
Førre veke fekk han altså prøva seg med elitejuniorane i Brann, samt ein del talent frå andre lokale bergenslag.

Stor hending
Jet-cup er årets store hending for juniorspelarar i Noreg. Talentspeidarar frå fleire toppklubbar både i Noreg og Europa følgjer med på den tradisjonsrike turneringa for elitejuniorane. I år deltok 24 lag frå sju land i cupen. For Matias og Brann sin del var cupen over litt for tidleg. Dei rauk ut etter at dei fekk tredjeplass i gruppa si.
? Det gjekk sånn passe. Laget gjorde det ikkje så veldig bra. Me spelte uavgjort i plasseringskampen mot Fredrikstad og kom på syttandeplass, seier Møvik.
? Er du nøgd med eigen innsats?
? Ja, det gjekk ganske bra, seier han.
Finalen laurdag vann Rosenborg.

Reiser med landslaget
Det er berre fotball på timeplanen til Matias i sommar. Han har ikkje teke ferie frå spelinga i det heile.
? Eg er i ganske god form sjølv om det er sommarferie, seier han beskjedent.
Det unge talentet merka seg positivt ut på ei landslagssamling i Porsgrunn i juni. No reiser han til Danmark for å spela med det norske flagget på brystet. Fjerdedivisjonsspelaren vart nemleg teken ut til G16 troppen som spelar Nordisk Meisterskap neste veke.
? Eg gledar meg til å reisa, seier den ivrige ungdommen.
Første kampen går måndag 30. juli mot Færøyane. Belgia er motstand tysdag, og torsdag møter Noreg og Matias det danske G16-landslaget. Laurdag 4. august er det plasseringskamp avhengig av kva plass Matias og lagkameratane får i gruppespelet.