Framleis kokevarsel på Fedje

Det var teknisk etat v/Øyvind Tolleshaug som gjekk ut med kokevarselet onsdag morgon i samråd med Mattilsynet.
- Dette kom litt overraskande. Sjølv drikk eg ein god del vatn, men eg har ikkje merka noko, seier rådmann Vidar Bråthen til Strilen ved 13.30-tida onsdag.
Teknisk sjef fekk meldinga om målinga onsdag morgon. For å vera føre var, vart det ordna med informasjon om kokevarselet til alle husstandar via dagens post.
Teknisk sjef Øyvind Tolleshaug opplyser torsdag til Strilen at målinga viste rundt 60 koliforme bakteriar (kanskje (tarmbakteriar) per 100 milliliter vatn. Til samanlikning hadde Meland førre veke ei måling på over 200 bakteriar på det verste. Der kunne kokevarselet opphevast over helga.
- Det er best å vera ærleg om slike ting. I tillegg til lappar i postkassane, gjekk me ut på heimesida og med oppslag. Så langt veit me ikkje årsaka. Me køyrer på med en del ekstra klor ved vassverket for å sjå om det vil hjelpa. Så snart me veit noko meir, vil me gå ut med nærare informasjon, opplyste  rådmann Bråthen onsdag føremiddag.
Torsdag seier teknisk sjef Tolleshaug at han ikkje vil spekulera i kva som er årsaka til at det har kome bakteriar i det kommunale drikkevatnet på Fedje.
Dagens reiseanlegg var nytt i 1971, men er seinare modernisert.
Måndag opplyser rådmann Vidar Bråthen til Strilen at det ikkje var bakteriar i ein prøve  tatt torsdag.
- For å vera føre var, gjeld kokevarselet inntil vidare. Ein prøve vert sendt inn i dag måndag.Resultatet får me tysdag, og då håpar me å kunna oppheva kokevarselet, seier Bråthen.