Framleis kritisk etter Bjørsvik-ulukka

Den to år gamle gut fekk livreddande førstehjelp, og bestefaren hans vart kjørt til sjukehus i ambulanse etter den tragiske hendinga.
 
Politiet fekk melding om ulukka i Bjørsvik klokka 10.48 laurdag. Meldinga gjekk ut på ein bil med folk i hadde hamna i sjøen ved kaien.

– Me kjenner ikkje alle detaljane enno, men det er på det reine at guten var åleine i bilen då den begynte å trilla. Guten er  to, snart tre år gamal. Bestefaren sprang etter. Han klarte å riva opp døra før bilen hamna i sjøen og hoppa etter for å prøva å berga guten, men fekk sjølv problem, opplyser Kjell-Idar Vangberg i Nordhordland lensmannsdistrikt.

Han seier til avisa, at folk i nærleiken kom til og fekk bestefaren opp av sjøen.

– Bestefaren var så bevisst at han fekk fortalt at det var ein gut i bilen, seier Vangberg.

Då politiet kom til staden, var lokale folk i gang med å leita etter guten.

– Kort tid etter at politiet var på plass, kom også luftambulansen. Dei hadde med dykkar. Dykkarar fann bilen på rundt 7 meters djup. Den var tom. Guten vart funnen ei stund seinare av ein båt frå brannvernet, opplyser Vangberg.

Politiet frykta ei stund at også guten si 6 år gamle søster var i bilen, men det viste seg heldigvis å ikkje vera tilfelle. Ho var trygt på land og i god behald.

Politiet rosar dei som kom først til ulukkesstaden for innsatsen
– Dei lokale som kom til gjorde ein god jobb, seier Vangberg.

Laurdag ettermiddag seier politiet at dei trur at det er guten sjølv som har klart å få start på bilen.

I 15-tida hadde Haukeland universitetssjukeus framleis ikkje sendt ut pressemelding om tilstanden til dei to, men lensmann Einar Vatne seier til bt.no at han har vore i kontakt med sjukehuset. Rapporten frå sjukehuset var då at guten var i live, men at tilstanden er kritisk.

Søndag var meldinga til media at både bestefaren og guten ligg i kunstig koma på sjukehuset. Tilstaden til guten skal framleis vera kritisk. Tilstanden til bestefaren på 69 år skal vera noko betre, men alvorleg.

I ei presseoppdatering måndag 4. juni er tilstanden uendra:; Guten er «kritisk skadd» og bestefaren «alvorleg skadd».