Framo Engeneering til Askøy

Formannskapet på Askøy skal i følgje BT vera orientert om Mohn-bedrifta sine planar på eit lukka formannskapsmøte torsdag. Etter det BT kjenner til, skal etableringa koma på Horsøy. Det varaordførar Øystein Holmelid vil stadfesta, er at kommunen kallar inn til ein pressekonferanse måndag. Holmelid vil ikkje stadfesta at det er snakk om Framo Engeneering eller at Horsøy er lokaliseringa.
På Horsøy er det tidlegare drive sildemjølfabrikk, som vart nedlagt i 2002. Eigar er Horsøy Industrihavn, og planen er å riva alle bygningar og sprengja øya flat samt å fylla ut ein del areal som i dag er sjø, melder bt.no.
Tidlegare i år stadfesta økonomidirektør Thorbjørn Vågenes til BT at Framo Engeneering var på jakt etter eigna tomt for store hallar til montering av oljeinstallasjonar. Då skal Hanøytangen ha vore merst aktuell, men det alternativet skal vera sjalta ut, skriv bt.no.
Vågenes uttalte torsdag til Strilen at verksemda i tillegg til ei etablering på Fjellsende, også jobba med ei anna lokalisering i bergensområdet.
? Me har nok trong for begge desse to nye lokalitatane, men i eit litt ulikt tidsperspektiv, uttalte Vågenes. På Fjellsende har grunneigarane uttalt til Strilen at det ikkje er aktuelt å selja frivillig.
Dagleg leiar i Radøygruppen, Lasse Ståløy, uttalte torsdag at dei håpar å koma i gang med si utviding, som ligg i Radøy kommune, i løpet av neste år.