Framo vurderer å satsa på Vetås

? Våre vurderingar er på eit tidleg stadium, og Vetås-området er eitt av fleire alternativ for bygging av monteringshallar, seier økonomidirektør Thorbjørn Vågenes i Framo Engeneering til Strilen.
Han viser til at førespurnaden til Lindås kommune, som vart informert om i planutvalet denne veka, berre er vel ei veke gammal. Framo har kontakta Lindås for å få planstatus for området, og så langt har ikkje selskapet fått noko tilbakemelding.
Vågenes viser til at det er Radøygruppen sine utvidingsplanar som gjer Vetås til eit alternativ som vert vurdert.

For liten plass
? Bakgrunnen for at me ser oss om etter meir areal, er at me treng meir plass til montering. Anlegget på Flatøy er høgt utnytta, og det er vidare utsikter til at me vil ha svært mykje å gjera, seier Vågenes.
Han viser til at Radøygruppen er ein av Framo sine underleverandørar. Med ei utviding av industriarealet der, seier Vågenes det er naturleg å vurdera dette som eitt alternativ. Radøy kommune har gjeve Radøygruppen grønt lys for å utarbeida eit framlegg til utviding av det eksisterande arealet.

? Berre sett på kartet
? Slik det ser ut på Vetås, kan det for vår del vera behov for areal som går over kommunegrensa til Lindås  Men som sagt er dette på eit svært tidleg tidspunkt. Me har så langt berre sett på kartet. Sjølv veit eg ikkje kva området mot sør heiter, og me har ikkje kontakta grunneigarar. Det vanlege i dag er å forhøyra seg om kommunale arealplanar før ein eventuelt går vidare og kontaktar grunneigarar, seier Vågenes.
Vågenes held det difor ope kva lokalisering Framo vil satsa på for ei nyetablering. Han seier også at det er for tidleg å seia kor stort areal som er ønskeleg og kor mange jobbar det kan verta snakk om.
? Me har så langt ikkje avgjort noko, og det er mange vurderingar som må gjerast før me eventuelt går i gang, seier Vågenes.
Det Framo treng plass for, er monteringshallar. Og sidan mange av modulane er for store for vegtransport, må verksemda ha areal som ligg ved sjø.