Framtidas forskarar

– Det blir sikkert både spennande, morosamt og utfordrande, meiner elevar Strilen snakka med. Onsdag var mellomsteget og foreldra samla til såkalla kickoff for forskingsprosjektet «First Lego League» (FLL).

Jubelen stod i taket
Når Strilen spør nokre tilfeldige jenter kva prosjektet går ut på, let ikkje svara venta på seg.
– Då spør du akkurat dei rette, for me var framme og fortalte litt om prosjektet like før du kom, seier Marthe og Sofie. 
– Berre vent litt, så skal me finna notatane våre, legg dei til og flyg ut døra.
Medan dei leitar, forklarer Synne og Elisabeth at dei fekk vita om prosjektet 9. september. Då hadde foreldra fått vita det kvelden før, men fekk ikkje lov å seia noko heime.
– Me vart veldig overraska og kjempeglade. Jubelen stod i taket, seier dei. 

Verdsomspennande
I det Marthe og Sofie er tilbake, forklarer dei at det er ei kunnskaps- og teknologiturnering dei skal vera med på.
– Kvar av femte- og sjetteklassane stiller med kvar sine lag, så me har fire lag, seier dei. 
Gjennom praktiske og teoretiske oppgåver skal desse laga konkurrera med lag over heile verda i å designa og byggja ein robot, får me vita. 
– Det er eit verdsomspennande prosjekt der 200.000 born frå 55 land deltek, og alle skal jobba med same oppgåva.
Berre frå Skandinavia skal 14.000 born fordelt på 720 lag delta, legg dei til. 

Les meir om prosjektet i Strilen frå laurdag 24. september