Frekhaug får gangfelt

? Det er veldig bra at me no får gangfelt. Men det har tatt unødvendig lang tid, seier Meland-ordførar Solbjørg Åmdal Sandvik.
I november 2004 vart bussterminalen på Frekhaug opna. Men for å koma seg til bussen frå senteret, har passasjerane nærast måtta springa over vegen mellom bilane. Dette vert det no slutt på. Statens vegvesen skal laga til heva gangfelt rett ved krysset inn til senteret. Det vert og heva gangfelt mellom sjukeheimen og rådhuset.
Dessutan kjem det fartshump like nedanfor innkøyringa til sjukeheimen, og fartsgrensa vert senka til 40 km/t. Men trafikktrygginga har ikkje kome av seg sjølv.
? Det har vore ein lang kamp, seier ordføraren. Ho fortel at vegvesenet først meinte det var for få fotgjengarar som kryssa vegen, så at det var for få bilar der. Men Åmdal Sandvik tok opp saka på ny på eit møte med ulike statsetatar i november.
? Veka etter fekk me ein telefon om at det skulle koma gangfelt, seier ho.
No har kommunen fått skriftleg stadfesting om at gangfelta kjem. Statens vegvesen reknar med at det kjem til å kosta mellom 50.000 og 100.000 kroner.