Frekhaug Vinduet treng meir areal

? I dag har me ståande ein hall på 1000 rutemeter attmed fabrikkbygget. Den står på eit mellombels byggjeløyve som går ut om to-tre år. Då må hallen rivast, og det er aktuelt å reisa eit nybygg på 2000-3000 rutemeter, opplyser dagleg leiar Arvid Birkeland.
Problemet er at det aktuelle nybygget vil ta det meste som er att av tomta verksemda eig i dag.

Areal «å gå på»
? Difor har me tatt opp med kommunen å få hand om eit ekstra areal på minst ti mål. Eigarane våre er lite mota på å byggja ut dersom me ikkje får dette arealet. Elles har me ikkje plass for ei framtidig utviding om det vert nødvendig, seier Birkeland.
Det arealet Frekhaug Vinduet ønskjer, må i så fall inn på eit areal der privat reguleringsplan no er under utarbeiding. Det meste av denne planen omfattar 300-350 nye bustader, alt etter utnyttingsgrad.

Beklagar
Fleire alt etablerte hus- og hytte-eigar ved industriområdet, er av kommunen informert om Frekhaug Vinduet sitt arealbehov. Innspelet frå verksemda var tidlegare unnateke offentlegheita, men er i ettertid frigjeve. Planansvarleg i kommunen har nyleg gått ut og beklaga at han ikkje visste om dette før no.
Huseigarar og andre har frist til 12. september med å koma med innspel eller merknader til Frekhaug Vinduer sine arealønskje.
Fagsjef Jens H. Bjordal vedgår at dette er eit planområde med ein del motstridande interesser.
? Siktemålet er at planen kjem opp i planutvalet i oktober. Så skal planen ut på første gongs høyring, seier Bjordal.