Friarbrev frå havgapet

? I vår hadde me faktisk full dekning med utdanna sjukepleiarar. Det var første gong på dei fire åra eg har vore i kommunen. Men no er me igjen i manko på to med offentleg godkjenning, seier Dagrun Gunnarson.

Som personalkonsulent på Fedje har ho sett signaturen sin på fleire brev. Dei har gått til både utflytte feiingar og andre som har vore innom kommunen si lønningsliste.

«Til deg som har arbeidd på Fedje tidlegare», er overskrifta på brevet. Gunnarson veit ikkje om mottakarane er i anna arbeid no. Men ho skriv at «eg tenkte at eg i alle fall kunne sende utlysingsteksten».

Billeg
annonsering

? Eg veit ikkje om andre kommunar har sendt denne typen friarbrev, men me har funne på dette sjølv, seier Gunnarson. Ho er raskt ute med å kreditera driftssjef Grete A. Herøy for å ha klekka ut idéen.

Korleis brevet måtte slå an, tør ikkje personalkonsulenten å spå noko om.

? Det skadar ikkje å prøva ein litt utradisjonell måte å rekruttera på. Me veit at dei som har fått brevet er flinke folk, og dette er dessutan billeg annonsering, seier Gunnarson.

Ho strekar under at brevet inneheld ei oppmoding om å søkja, ingen garanti for å verta tilsett.

Og om det ikkje let seg gjera å lokka nokon av mottakarane tilbake, så får dei i alle høve «ei varm helsing frå oss her ute i havgapet».

? Eit kompliment

? Eg tar brevet som eit kompliment! Faktisk har eg fått slike brev eit par gonger tidlegare, blant anna då eg var under utdanning, seier Anita Hatlem (27), for tida busett i Haugesund.

Men tilbakemeldinga hennar er at ho førebels er nokså fastgrodd i Sildajazzens heimby.

? Eg har jobba som sommarvikar på Fedje fleire år sidan 1996. No er eg sambuande, har to born og er tilsett i heimetenesta. Nett no har eg permisjon.

? Kunne du tenkja deg å flytta tilbake til Fedje?

? Eg er nok eit typisk eksempel på den utflyttinga Fedje vert råka av. Problemet er å finna jobb for begge to. Sambuaren min er blikkenslagar og jobbar innan ventilasjon. Dermed er det ikkje så lett å finna jobb for han på Fedje. Men om det var mogeleg er det ikkje usannsynleg at me hadde vurdert flytting. Eg har blant anna to søstre som bur på Fedje, seier Anita Hatlem.