Frisk innsats, men tap for Eikanger

Kampen mellom nyopprykka Eikanger og gruppeleiar Djerv vart ei kraftprøve for begge lag laurdag. Sola steikte frå skyfri himmel på Ostereidet kunstgras, og dommaren la inn fleire drikkepausar i den tette og heite kampen.

Sjanserik omgang
Djerv kom til Ostereidet utan tapte poeng, og dei sette tidleg ein støkk i utfordrar Eikanger. Gjestane hadde to store målsjansar tidleg i kampen, men ein dyktig Kristian Kvammen mellom stengene hjå Eikanger heldt laget inne i kampen. Oransjetrøyene hadde også ein lang, god periode i første omgang, der dei produserte fleire målsjansar. Richard Toft sine langskot, flott veggspel og Matias Møvik sin høgrefot på dødball gjorde det til tider skummelt å vera Djerv-keeper. Fem minutt før dommaren blas av til pause, var det likevel Djerv som sette ballen i nota. Medan heimelaget trudde dommaren skulle blåsa av for frispark, nytta gjestane høvet og sette pauseresultatet til 0-1.

Friske bein
Slutten av førsteomgang gjekk føre seg på Djerv sin banehalvdel, og Eikanger var ivrige etter ei utlikning. Også etter pause var det heimelaget som viste mest initiativ. At Djerv auka leiinga til 0-2 i første speleminutt etter pause, verka berre å tenna dei oransjekledde ytterlegare. Andre omgang var jamn, men bytte av trøtte mot friske bein sette opp tempo i varmen. Unge og ivrige utfordrarar fekk vist at dei gjerne vil ha meir speletid. Aleksander Hindenes sprang imponerande langt på kort tid, og Henning Gjelsvik serverte det eine flotte innlegget etter det andre. Mål vart det likevel ikkje, og Djerv kunne ta med seg tre poeng frå Ostereidet.
Åttande
Eikanger plasserer seg etter ni spelte kampar på ein åttandeplass. Søndag som kjem møter dei Gneist på bortebane.