Friske Austrheimingar

Austrheim hadde i andre kvartal i år nest lågast sjukefråver i heile fylket. Berre i Granvin er folk mindre sjuke, der er dei heime frå arbeid 3,4 prosent av tida.

? Eg trur ikkje det har så mykje med legane å gjera kvifor statistikken er slik. Eg trur det går meir på næringsgrunnlaget i denne kommunen, seier kommunelege i Austrheim Peter Kubon til avisa Vestnytt, som konkluderer med at strilar i nord er friskare enn strilar lenger sør.

Sjukefråveret i Lindås er langt høgare enn i Austrheim, men er på veg nedover. Modalingane er sjukast i fylket.

I Hordaland var sjukefråveret i april, mai og juni på 5,5 prosent, ned frå 6,3 prosent i same periode i fjor. Tala gjeld legemeld sjukefråver. Dersom ein tek med eigenmeldingar, er sjukefråveret på 6,3 prosent ? ned frå 7,0.

Sjukefråveret i Hordaland er minst innan olje- og gassutvinning, med 3,4 prosent. Mest sjukefråver finn ein innan helse- og sosialtenester, med 8,0 prosent. Dette forklarar i stor grad kvifor sjukefråveret er størst i kommunal sektor. I fylkeskommunar og i staten er folk mindre borte frå jobb, og sjukefråveret er minst i privat sektor. Folk som jobbar i offentleg administrasjon, er lite sjuke.