Frp åleine imot kunstsenter

Debatten kring Radøy Kunst Senter (RKS) har til tider vore høglydt. Og det er ingen løyndom at Radøy Frp har vore mot å gje ny leigekontrakt til RKS i Haugland skule. Men Lena Bø Nilsen ville ikkje ha det på seg at Frp ikkje støttar kulturtiltak.
? Me har støtta kulturen i Radøy, og noko anna kan ingen påstå. Men me er ueinige i avtalen. Dei kan få kjøpa skulen, så kan me koma og støtta av og til, sa Bø Nilsen på kommunestyremøtet torsdag. Ho ville bruka pengane frå eit eventuelt sal på tiltak for born og eldre.
Bø Nilsen fekk motbør frå fleire i salen, mellom dei Ragnar Floen (Ap).
? Frp har gått i mot kulturdelen i Radøy. Dei vil rasera kulturen i Radøy. Me subsidierar ikkje kunstsenteret, dei subsidierer oss, sa Floen.
? Frp set svake grupper opp mot kvarandre. Det er ein hersketeknikk eg ikkje likar, sa han vidare.

Leige til 2016
Grunnen til at ny leigeavtale må til politisk handsaming er at kunstnarane Åse Eriksen og Roger Gjerstad, som driv RKS, har kome med framlegg om endringar i avtalen. Mellom anna ville dei at kommunen skulle ha ansvar for vedlikehald av bygningen. Dette var kommunen ikkje samd i, men ville at vedlikehaldsarbeid og investeringar frå leigetakarane skulle koma dei til gode ved eit eventuelt seinare sal.
Formannsskapet si innstilling var at leigeavtalen i all hovudsak vart vidareført til 2016. Dette vart vedteke i kommunestyret mot Frp sine fem stemmer.