FrP og Høgre varslar omkamp om Radøy-veg

Ordførarkandidatane for FrP og Høgre, Lena Bø Nilsen og John Bauge, reagerer sterkt på at Ragnar Floen (Ap) i eit intervju i Strilen går til åtak på dei for å ønskja omkamp i samband med vegtraseen. Dei viser til at kommunestyret vedtok seint i 2005 at «armen» til Manger måtte koma i ein tidleg fase. No ligg det an til at Marås - Soltvedt kjem først, og at dei to andre strekningane kjem i ein seinare fase. Dette er ikkje i tråd med kommunestyrevedtaket, meiner dei to.

Manger først
? Dersom det vert noko av Nordhordlandspakken, må strekninga Marås - Tolleshaug med «arm» til Manger koma først, seier Lena Bø Nilsen.
Ho meiner dette er meir i tråd med det vedtaket kommunestyret gjorde.
? Strekninga Marås - Soltveit er meir ein veg for folk i Austrheim og Fedje, enn for radværingar flest, seier ho.
Bauge seier og at det no verkar svært usikkert om det vert noko av Nordhordlandspakken. Dette på grunn av at Lindås stiller krav om ein bom på Radøy, noko eit samla kommunestyre i Radøy ikkje vil ha noko av, og den store motstanden i Meland mot ein bom på Flatøy. Dersom det ikkje vert noko av Nordhordlandspakken, har ein god tid til å endra traseen for riksveg over Radøy til eit vestleg alternativ, meiner Bauge.

Kan endra trase
Det beste riksvegalternativet for bedrifter og folk på Radøy, er at vegen går frå Soltveit og vestover ein stad mellom Kuvågen og Hella, og så vidare til Manger. Derifrå bør vegen gå til Tolleshaug over Kartveit, meiner Bauge og Nilsen. Dei meiner det og vert eit rimelegare alternativ, og dermed meir realistisk. Det er også betre med tanke på at det er planlagt eit samband under Bognestraumen over til Holsnøy i ein seinare fase, meiner dei to.
? Eg har fått forklart at me risikerer å mista pengane som ligg inne i Nasjonal Transportplan (NTP), dersom me endrar trase. Det har gjort at me til no har vore tilbakehaldne med å føreslå endringar. Men no viser det seg at pengane i NTP berre er såkalla «marginalmidlar» - det vil seia at pengane berre er der dersom det vert noko til overs i slutten av NTP-perioden, seier Bauge,
Han viser til at NTP stort sett har vore underfinansiert, slik at det aldri står pengar igjen. Marginalmidlar er difor nesten jamgodt med ingen pengar, meiner han.
Men vert det noko av Nordhordlandspakken, og denne vert vedteken av Stortinget, vil det koma pengar frå staten til vegprosjekta. Det er då FrP og Høgre vil prioritera den sørlege strekninga først, og Marås ? Soltveit seinare. Dette meiner dei vil vera fullt mogleg å gjera innafor ramma i pakken.