Frykta kattungane skulle døy

Den kjærlege hokatten vart funnen vandrande, fortvila og med mjølkespreng, ved badevika på Hestnes av ein kattevenn. – Me er veldig letta. Me var redde for at ungane skulle døy utan mora, seier matmor Renate Olsvoll Dale.Ho såg bilete av katten, som heiter Snehvit, i Strilen 23. juli.

– Me var på ferie då ho forsvann. Då me kom att og såg ho var borte, gav me ungane lettmjølk og vatn. Me har ein annan katt som óg har fått fire ungar. Ho lét dei morlause ungane dia siste dagen Snehvit var vekke, så dei hadde kanskje vorte adoptert om Snehvit ikkje hadde komme att, seier Renate.Den tredje hokatten deira har og sett litt vel rund ut i det siste.

– Det kan nok hende det kjem eit kull til, seier Renate med eit lite sukk.Det er kjekt med kattungar, men dei såg ikkje for seg eit dusin kattar og fleire på veg då eldstedottera Ronja skulle få seg eit kjæledyr.– Me skal sjå på prisar for sterilisering, men me står óg midt oppi husbygging, så me har ikkje avgjort korleis me skal takla dette enno. Sterilisering vil me i alle fall venta med til hokattane er ferdig med amminga, seier ­Renate.