Fryktar dårleg vedlikehald på Mongstad

«Vi stiller spørsmål om kor alvorlig ei hending må bli for at informasjonsleiar Tjore kan innrømma at ein har hatt ei alvorlig hending?! Når det går liv tapt ved anlegget, når alt liv i sjøområdet døyr eller når Mongstadområdet er ein saga blott?!»

Det spør Marita Bru i den lokale nærmiljøgruppa av Norges Miljøvernforbund i eit innlegg Strilen har fått etter oljeutsleppet på Statoil Mongstad måndag.

Bru skriv at nærmiljøgruppa er tvilande til om vedlikehaldet på Mongstad vert godt nok i tida framover, med det store resultatunderskotet Statoil Mongstad no går med.

«I skriftlege og muntlege dialogar med Statoil Mongstad har me gjentatte gonger vorte beroliga med flotte rapportar og diagram. Det som er eit dilemma her, er at vi tydelegvis tolkar desse ulikt! Der Statoil seier «ingen fare», seier vi: «Her er det tid for forbetring», skriv Bru mellom anna i innlegget, som kjem på trykk i Strilen torsdag.

– Hendinga på Mongstad måndag var det me kallar ei lita hending. Den hadde ikkje noko med dårleg vedlikkehald å gjera, seier informasjonsleiar Jon Halstein Tjore i ein kommentar.

Det var kring 10 litar tyngre olje som rann ut via ein flens i krakkeren. Sidan olja var varm, var det ein viss fare for antenning, og det medverka til at ein evakuerte alle tilsette som var på jobb.