Fryktar skadar etter flaum på Fossemyra

Det er alt konstatert skade på kunstdekket etter den første flaumen i haust. Ifølgje eit brev frå idrettslaget til kommunen kjem denne skaden til å verta utbetra til våren/sommaren 2006, når det er varmare i veret.

Men leiar i Kvernbit, Bjørn Tore Hesjedal, fryktar at det kan visa seg å vera meir omfattande skadar på dekket. Dette kan gje store kostnader i framtida.

? Har gruslaga under toppdekket flytta på seg, spør Hesjedal i brevet til kommunen.

20 millionar

Idrettslaget ynskjer no å koma i dialog med kommunen for å finna ut kva som kan gjerast for å unngå nye flaumar.

Leiar Hesjedal peikar på at baneanlegget medrekna idrettshus og garasje har ein samla nypris på kring tjue millionar.

Han meiner at det ikkje er mange andre stader i Meland som har like store verdiar samla på ei flate.

? Når leiinga i klubben må overvaka vermeldinga meir enn fotballkampar for gamle og unge, har me nådd eit nivå me ikkje kan leva med i framtida, skriv Hesjedal.

Store kostnader

Kva det vil kosta å reparera den skaden som alt er skjedd, er ikkje klart no.

? Fotballforbundet seier at den årlege utgifta til vedlikehald av kunstgrasbaner er på kring 150.000 kroner. Det meste av dette er dagleg reinhald med tanke på å fjerna blad og skit. Då seier det seg sjølv at ein slik flaum gjev oss fleire års vedlikehaldsutgifter kvar gong.

Idrettslaget meiner at dei har gjort det dei skulle i samband med dreneringssystemet rundt baneanlegget, både i samband med prosjektering, nedlegging av røyr og seinare gjennomspyling.