Fryktar ulukker ved barnehage

? Me får mellom anna eit stort byggevarefirma som nabo. Det har vore ein stille og roleg veg, men no kjem den nok til å verta brukt av mellom anna trailerar, og det vert during dagen lang, seier Torill Seliussen, styrar i Trollskogen barnehage.

Dårleg parkering
Det er Standard Eiendom, Foss Eiendom og byggevarefirmaet Stevnebø som har kjøpt tomtane, og som vil få tilkomst forbi barnehagen og bustader. I godkjende reguleringsplanar er det og planlagt fortau forbi barnehageområdet.
? Me har alt veldig dårlege parkeringstilhøve, og eit fortau vil gjera det verre. No veit me ikkje kva me skal gjera, seier Seliussen.
I dag brukar barnehagen heile plassen i tillegg til området der vegen skal komma. Seliussen fryktar kaos ved henting og bringing til barnehagen, og fortel at det alt har skjedd fleire nestenulukker på grunn av dårleg plass.
? Det kjem til å verta kaos og ulukker, det kan eg seia på førehand, seier Seliussen.

Godkjend
Ivar Thorsheim, dagleg leiar i Lindås Tomteselskap, fortel at godkjende reguleringsplanar alltid har lagt opp til at vegen skal gje tilkomst til industriområdet.
? Det er den vegen som er godkjend og stadfesta i reguleringsplanen. Det har aldri vore snakk om å nytta nokon anna veg. Barnehagen har og vore kjend med desse planane sidan tomten vart kjøpt, seier Thorsheim.
Barnehagen er kjend med reguleringsplanane, men Seliussen påpeikar at på deira teikningar skal ein av industritomtane ha tilkomst frå ein annan veg. I tillegg meiner ho at dei har vorte førespegla at ein voll skulle koma opp mellom industriområdet og barnehagen.
? Fem avdelingar er avhengige av å komma seg trygt bort i friluftsområda, og med slik bruk av vegen kan det verta vanskeleg, seier Seliussen.

Inga løysing
Thorsheim meiner det må vera opp til barnehagen å løysa problemet om tilkomsten.
? Ser du det som uproblematisk at det kjem til å vera tung trafikk forbi barnehagen?
? For meg er det heilt uproblematisk, men klart det ikkje er det for barnehagen. Dei må ta fatt i det og løysa det sjølve, seier Thorsheim.
? Er det mulig å legga tilkomsten til industriområdet ein annan stad?
? Ein kan heller snu på flisa  og spørja om barnehagen kan ha tilkomst ein annan stad. Uansett er det kommunen som godkjenner reguleringsplanane, og dei må svara for det, seier Torsheim.   Seliussen og styret i barnehagen har send klage til kommunen, men ikkje fått svar.  ? Me forstår at vegen er godkjend i planane, men det må gå an å visa skjønn. Me skulle eigentleg bygga lenger inne her, men fekk beskjed om at den trafikken barnehagen kom til å generera,  ikkje passa i eit bustadområde. Eg håpar dette også gjeld i denne saka, seier Seliussen.