Full bom-splitt i Meland

Med tolv mot fire røyster sa representantskapen i Regionrådet ja til vegpakken med bompengar. Mindretalet ville utsetja saka til 2009.

Alle sa at her måtte ein ikkje setja opp ein motsetnad mellom sentrum og periferi då representantskapen i Regionrådet diskuterte om ein skulle seia ja til Nordhordlandspakken med innlagd bompengesøknad eller ikkje. Men faktum er at medan representantar for Radøy, Austrheim og Masfjorden tala varmt for pakken og verdien av å stå saman og løfta i flokk, var det representantar frå Lindås og Meland som røysta mot.

Mandat
? Me har eit mandat frå veljarane våre som me ikkje kan gå bort frå, sa Nils Marton Aadland frå Høgre i Meland.
Han sette fram forslaget om at arbeidet med Nordhordlandspakken vert lagd på is til Stortinget har vedteke Norsk tranportplan for perioden 2010-2019. Vidare vart styret i Regionrådet bede om å jobba aktivt for at Nyborgtunnelen kjem inn i vegplanen for denne perioden.
? Me har ingen garanti for at Nyborgtunnelen kjem med i fase 2 om me no seier ja til fase 1, sa Aadland.

Gratis omkøyring
? Me kan ikkje gå inn for ein pakke der Nyborgtunnelen ikkje er med, og der det ikkje er opna for gratis omkøyringsveg i Åsane for dei som vil unngå bommen, sa Aadland vidare. Han viste til vedtaket som representantskapen i Regionrådet gjorde i oktober 2004.
Han fekk støtte frå Helge Bauge, Ap i Meland og Torunn A. Gamst frå Høgre i Lindås.

Verta samde
Bjørn Arne Aakvaag frå Lindås Frp gjekk og mot, men han argumenterte meir prinsippielt mot bompengar.
? Staten har meir enn nok pengar til å byggja vegar viss berre politikarane vil, sa han.
? No må me ikkje stridast innbyrdes medan verda går i frå oss, sa Erik A Riisnes, Sp Masfjorden.
Han talte varmt for å seia ja til Nordhordlandspakken for å få løyst vegprosjekt andre stader i Nordhordland enn i søre delen.
Og Aadland og Gamst fekk ikkje følgje av partikollega John Bauge frå Radøy.
? Det er ønsketenking å tru at staten vil stå for all utbygging sjølv om me skulle ønskja det. Me må ta utgangspunkt stoda slik ho er i dag, sa han.

Til kommunane
Også Ragnar Floen, Radøy Ap, talte varmt for å seia ja til Nordhordlandspakken.
? Den kan gje eit løft til heile regionen. Stundom må ein vera villig til å svelgja ein bitter pille, sa han.
Fleirtalet i representantskapen seier altså ja til å søkja Stortinget om løyve til å begynna bompengeinnkreving for ei rekkje vegprosjekt rundt i Nordhordland. Innkrevinga kan starta i 2009. Så er det meininga at ein skal ha ein fase 2, der Nyborgtunnelen er det tyngste prosjektet.
Saka skal no opp i kommunestyra i dei seks kommunane som pakken omfattar.  Derifrå går ho vidare til fylkestinget. Dersom dei vedtek å senda saka vidare, er det Stortinget som tek den endelege avgjerda.
Representantskapen tok også med punkta frå kommunestyret i Lindås om at ein skal prøva å få ei rettferdig fordeling av bompengeinnkrevinga, eventuelt med bommar fleire stader i distriktet.