Full krangel om Kvingo-telt

Påstand står mot påstand i striden om dei overbygde oppdrettskara på Sør-Kvingo. Advokatar er hyrte inn på begge sider. Naboen meiner at dei overbygde kara med plasttelt er til stor sjenanse, og at dei er eit svært skjemmande innslag i lokalmiljøet. Difor krev dei at dei svarte plasttelta vert fjerna og erstatta med takkonstruksjonar som er meir i samsvar med det som finst i området rundt.
Naboen sin advokat seier og at det ikkje berre er denne naboen som har ulempe av telta, men mange andre og. Dei klagar og på støy.

Ikkje etter lova
Klagar meiner og at denne sak ikkje kunne avgjerast administrativt i kommunen sidan han meiner dette er ei sak som er prinsippiell. Difor burde ho vore oppe til politisk behandling. Han meiner vidare at kommunen burde kontakta Marin Harvest for å få dei til å koma med alternative takløysingar.
Klagar seier vidare at kommunen har trekt inn utanforliggjande tilhøve då dei gav permanent løyve til plasttelta ved å visa til at ei ny vegløysing ned til anlegget er til fordel for alle.
Klagar krev at det permanente løyvet for tildekking vert trekt tilbake, og at klagar får dekka kostnader dei har hatt i saka.

Tilbakeviser
Marin Harvest sin advokat tilbakeviser alle påstandande frå motparten. Dei meiner dei kjegleforma telta som no er sette opp, totalt sett er den beste løysinga. Og dei meiner det er rett når kommunen har gjort ei samla næringsmessig vurdering av om dei skulle godkjenna dei omsøkte tiltak eller ikkje.
Saka kjem opp i planutvalet i Masfjorden 18. januar.