Full stopp for Firda-fisken til Russland

Bedrifta er ein del av Firda Management, og slaktar all oppdretta laks og sjøaure frå konsernet i Gulen.

Tidlegare i år fekk Martin E. Birknes Eftf. melding via Mat­tilsynet om at dei frå 5. mai var utestengt frå å eksportera fersk laks og sjøaure til Russland. Same melding fekk omtrent 30 prosent av alle norske slakteriverksemder for laksefisk. For Martin E Birknes Eftf gjeld restriksjonane frå og med sist måndag også fryst fisk.

Russisk tiltak
Forbodet mot å selja laksefisk til Russland er sett i verk av dei russiske veterinær­myndig­heit­ene, og det er grunngjeve med at dei har funne uønskte bakteriar i importerte vareparti frå verk­semda. Mattilsynet skriv i ei pressemelding at dei skal følgja opp slakteriet på Byrknes med tilsyn og prøver.

– Det er kjedeleg for oss at me no er heilt utestengd frå den russiske marknaden. Me har kundar der som er avhengige av fisken vår, seier adm. direktør Carl-Erik Arnesen i Firda

Management. Han vil like fullt ikkje karakterisera situasjonen som dramatisk for selskapet. Importstoppen er også mellombels.

Stenging og opning
– Russiske veterinærmyndigheit­er har lenge halde på med å stengja og opna marknaden sin for ulike norske eksportørar av laksefisk, konstaterer Arnesen.

Firda-konsernet har i seinare år satsa mykje på Russlands-marknaden, som har vorte svært viktig for selskapet.

Siste årsmelding frå Firda Management fortel at konsernet i fjor selde fisk for vel 312 millionar kroner til Russland, og det utgjorde 64 prosent av alt fiske­salet.