Fulle kyrkjer som vanleg

? Dei prestane eg har snakka med, rapporterer om «fullt» eller «stappfullt» ved gudstenestene også på julaftan i år. Så kyrkjebesøket har nok vore som vanleg, seier prost Helge Hitland.
1. juledag var det som vanleg langt betre plass i benkeradene.
? Då kunne me ønskt oss litt fleire. Men sjølv høyrer eg til dei som gler seg over godt besøk på høgtidsdagane, sjølv om besøket elles i året er mindre, seier prosten.
Han noterer seg blant anna at på Lygra, der det bur rundt 400 menneske, var det 200 som deltok på gudstenesta julaftan.
? Sjølv var eg i Knarvik Misjonshus, og der var det stappfullt med rundt 200 som deltok, seier Hitland.
Han peikar på at plassproblema i Alversund og Knarvik ved dei store høgtidene, vert stadig tydelegare.
? Det dumme her er at enkelte faktisk tenkjer at «det er ingen vits i å gå» sidan det er så liten plass. Trass denne tankegangen var det smikkfullt i Alversund-kyrkja, seier Hitland.
I Modalen var gudstenesta julaftan ved Anne Nordvoll, som bur i Knarvik og er ferdig utdanna prest til våren.
? Og ivrige kyrkjegjengarar i Modalen har alt sendt melding om at ho er velkomen tilbake! fortel prosten.
Elles kom det inn store offer til Kirkens Nødhjelp.
? Kyrkjelydane i Lindås bidrog med ikkje mindre enn 76.321 kroner. Det synest eg er ei fantastisk handsrekning til hjelpearbeidet blant dei jordskjelvråka i Pakistan. I Lindås-kyrkja kom det inn 12.500 kroner, i Myking-kyrkja 10.500 og i Knarvik misjonshus 9000 kroner. Frå dei andre kyrkjene låg offeret på fem-seks tusen kroner, opplyser Helge Hitland.