Fullt stipend til Tommy Urhaug

? Eg er veldig glad for å få dette stipendet. Det gjer det lettare å leva av idretten, seier Urhaug.
Han har fått stipendet fleire gonger før, sjølv om kriteria for tildelinga av stipendet er mange og krava er strenge. Ein må først og fremst prestera særs bra i sin idrett. Urhaug må tilpassa treningsmengd og inntekter etter krava. Han må også fortelja Antidoping Noreg kvar han er til ei kvar tid.
? Eg må visa at eg driv med dette på fulltid, at det er jobben min, seier Urhaug.

Ny robot
Det er også avgrensa kva Urhaug kan nytta pengane til. Stipendet er mellom anna meint å brukast til utgifter i samband med dagleg trening, som til dømes utstyr som kan gje treninga større effekt og betre kvalitet.
Urhaug har nytta delar av pengane han fekk i fjor til ein ny robot.
? Den er mykje betre enn den førre eg hadde, då den er meir uforutsigbar. Og den bør halda ei stund, for den kosta 20.000 kroner, seier Urhaug.
Størstedelen av stipendpengane går med til reising til og frå trening.
? Eg sat og laga rekneskap over i fjor, og det er utruleg mykje pengar som går med til den køyringa, seier Urhaug.

Mental test
Etter eit år med mange oppturar, har Urhaug også i år vorte nominert til Årets funksjonshemma idrettsutøvar for 2005. Prisen vert delt ut under Idrettsgallaen 2006, som går på Hamar laurdag.
? Det er artig å vera gjengangar i den tevlinga. Det viser at eg har jamn form, og klarar å halda meg i toppen, seier Urhaug.
Urhaug kan fortelja at 2005 var det året med mest trøbbel til no. Han har mellom anna hatt ei skade i ryggen i lengre tid.
? Eg har verkeleg fått testa den mentale styrken min, og er godt nøgd med året, seier Urhaug.