Funkishus på høyring

Det er etter krav frå planutvalet at eigaren av området har fått utarbeidd foto som viser korleis leilegheitsbygget kan ta seg ut. Tidlegare har fleire fastbuande i området gått ut med kritikk av utforminga, som er stempla som funkisstil som ikkje passar inn i Alversund.
Det er også reagert på storleiken på prosjektet.
? Frå utbyggjar er det presisert at det som no er vist, er det dei kallar bygningskroppar. Den nøyaktige utforminga kan verta endra når det vert søkt om rammeløyve, presiserer saksbehandlar Frøydis Ones.

Ute i fire veker
Planutvalet fekk onsdag også sjå ein filmpresentasjon av prosjektet frå ulike vinklar. Deretter vart det gjort vedtak om å leggja reguleringsplanen ut til første gongs ettersyn. Planen vert truleg lagt ut over nyttår og skal liggja ute i fire veker.
I utgangspunktet er planen å byggja tre blokker med 36 leilegheiter pluss bil- og båtgarasje.
? I høve til tidlegare plan, er det gjort få endringar i det framlegget som no går ut til høyring. Arkeologisk funn gje at eit område tidlegare avsett til friområde. må liggja i fred som LNF-område. Elles er gangvegane litt endra opp mot det å sikra offentlege gangvegar i området, påpeikar Frøydis Ones.

For mykje blikkfang?
I administrasjonen si utgreiing står å lesa at det ikkje er utarbeidd ein modell, slik politikarane eigentleg har bede om. Ein pappmontasjemodell ville verta for dyrt, har utbyggjar argumentert med. Men det er altså vist foto og filmpresentasjon.
Uansett er administrasjonen i stuss korleis blokker med flatt tak vil ta seg ut ved sjøleia i Alversund.
«Sjølv om bygget som ligg på tomta i dag vert oppfatta som stygt av mange, må vi stilla oss spørsmål om det er godt nok å få eit bygg som «berre» er betre enn det som er i dag. Administrasjonen er ikkje trygg på om arkitekturen som er valt for det nye bygget, vil vera med og framheva landskapet eller opplevinga med å vera i landskapet på sikt», er formuleringar som er brukte.
Det vert og peika på at den valde utforminga gjer at nybygget vert eit blikkfang dersom det vert gjeve byggjeløyve.