Fylkesmannen underkjenner Lindås si sakshandsaming

Det var i april i fjor at det vart sett opp eit gjerde rundt Bjarne Foss sin eigedom like ved Reklamehuset i Knarvik. På denne tomta var det for nokre år sidan eit bygg med eit trykkeri, men trykkeriet er flytt og bygget rive.
Gjerdet avgrensa berre Bjarne Foss sin eigedom, men var likevel til hinder for naboen Reklamehuset ANS. Slik deira bygg er utforma, vert både tilkomst med bil og parkering sterkt avgrensa om ikkje delar av Foss si tomt kan nyttast. Slik det er i dag, parkerer gjester til likningskontoret og andre leigetakarar hjå Reklamehuset i realiteten på Foss si eigedom, og det var denne parkeringa som fekk ein brå slutt då gjerdet kom opp.
Reklamehuset ANS sin advokat sende raskt brev til kommunen om gjerdet, datert 27. april 2006. 2. mai hadde administrasjonen sitt vedtak klart, der det vart sett fram krav om at gjerdet måtte fjernast innan 5. mai, altså innan tre dagar. Dersom dette ikkje vart gjort, ville kommunen vurdera tvangsmulkter.

Manglande førehandsvarsel
Eit fleirtal av politikarane i plan- og miljøutvalet stadfesta administrasjonen sitt vedtak då saka kom opp til politisk handsaming 22. juni.
Men no må altså saka handsamast på nytt i Lindås kommune, etter at Fylkesmannen har oppheva både det administrative vedtaket og den seinare politiske stadfestinga. Fylkesmannen si avgjerd er endeleg, og kan ikkje påklagast.
Det første punktet der Fylkesmannen finn feil i sakshandsaminga er at Foss ikkje fekk høve til å uttala seg i saka før det vart gjeve pålegg om riving av gjerdet.
? I denne saka er det ikkje gjort slik førehandsvarsling som lova krev, heiter det i vedtaket frå Fylkesmannen.

Manglande rettleiing
Vidare vart det frå kommunen si side ikkje gjeve slik rettleiing som kommunen pliktar å gje. Fleire andre nabotomter er gjerda inn, og då kommunen fekk spørsmål frå Foss si side, skulle administrasjonen ha gjeve rettleiing om kva slags gjerde som kunne godkjennast.
? Sjølv om kommunen ikkje vil godkjenna gjerdet slik det opphavleg vart oppført, er det sannsynleg at tiltakshavar kan få løyve til oppføring av eit gjerde på tomta, heiter det i vedtaket.
? Manglande førehandsvarsel og manglande rettleiing inneber at saka ikkje er undergjeven ei tilfredsstillande kontradiktorisk handsaming, heiter det i konklusjonen.
Kontradiktorisk inneber at begge partar skal høyrast før avgjerd vert teken.

Utan føringar
I vedtaket frå Fylkesmannen er det presisert at sjølv om Lindås kommune sine vedtak no er oppheva, skal ikkje det leggja føringar for kva som vert utfallet av seinare vedtak frå kommunen si side.