– Gje vekk ein genser til jul

Ein tur til Etiopia i haust gjorde sterkt inntrykk på Helge Brekke. Han har besøkt landet fleire gongar i samband med eit hjelpeprosjekt som Knarvikmila og Knarvik ungdomsskule har engasjert seg i.  På årets tur var dei blant anna innom ein skule i Addis Abeba.

– Gjekk i utslitne genserar
– Mekdela grunnskule er ein skule for born i ein vanskeleg situasjon. Dei kjem frå familiar som slit med pengar til det aller mest grunnleggjande. Skulen har 1200 elevar i alderen 3 til 18 år. Då me var der la eg merke til at alle elevane gjekk i lyseblå genserar. Det var skuleuniforma deira, men genserane var heilt utslitne. Mange av dei var rakna og holete, seier Knarvik-milgeneralen.

Han spurte difor på skulen om kven som skaffa desse genserane.

– Svaret var at det var skulen som skaffa genserar til elevane, fordi foreldra hadde så dårleg økonomi at det ikkje var muleg at dei kunne gjera det. Men skulen har heller ikkje pengar. Mange av dei som jobbar der, er frivillige.

25 norske kroner for kvar
Medan Brekke stod der og såg på borna med dei slitne genserane kom han til å tenkja på alle genserane han sjølv hadde liggjande i klesskåpet heime.

– Eg har til og med genserar som eg ikkje har brukt, og eg må innrømma at eg følte meg ikkje så reint lite bortskjemd der eg stod, seier han, og fortel at han difor spurte kor mykje desse skulegenserane kosta per stykk.

– Eg fekk vita at det var snakk om 75 birr per genser. Det vil seia ca. 25 norske kroner.

På «strak arm» lova mannen frå Knarvik å ordna genserar til heile skulen, seier han. Og når ein lovar noko, må ein sjølvsagt halda ord.

Vil gje, heller enn å få
Knarvikmila og Knarvik ungdomskule har i fleire år samarbeidd med organisasjonen Great Ethiopian Run, og Unicef, om prosjektet Utdanning for born og ungdom i Etiopia. Og utsendinga frå Knarvik var i Etiopia for å overlevera pengar til dette prosjektet, som i år får 500.000 birr (ca. 170.000 NOK) frå Knarvikmila og Knarvik ungdomsskule.

Då Brekke fylte 70 år tidlegare i år, ønskja han seg pengar til dette prosjektet i staden for gåver til seg sjølv. Det resulterte i 45.000 kroner som også er overført til prosjektet. No håpar han at han å klara og skaffa ein fin sum til genserar.

Har laga gåvekort
Brekke håpar også at andre har lyst til å gje ei symbolsk gåve til jul. Difor har han oppretta ein eigen konto til genserprosjektet.

– Dette prosjektet kjem i tillegg til det prosjektet me alt har. Kontoen vert open fram til 1. mars 2012, og eg håpar at me innan den tid skal klara å skaffa nok pengar til genserar, seier Brekke.

Han har også ordna det slik at dei som ønskjer å gje genserar som ei symbolsk julegåve til nokon, kan bruka eit gåvekort som dei kan få på Knarvik senterkontor, Atleten og Kiwi i Knarvik og Kiwi på Ikenberget.

– Me som bur i Noreg veit ikkje kor heldige me er. Folk har stort sett så dei klarar seg og vel så det, og då synest eg at det er fint å kunna gjera ein innsats for dei som ikkje har så mykje som oss, seier han.

Brekke opplever at det å engasjera seg for hjelpeprosjekt i Etiopia er noko av det mest meiningsfulle han har gjort.

Dersom du har lyst til å hjelpa med pengar til genserar, kan du setja inn det beløpet du måtte ønskja på kontonummer 3800 15 50281.