Gjev hjartestartar til idrettsbygga

– Det var det som skjedde under fotballkampen i Sogndal tidlegare i haust som fekk oss til å bestemma oss for at me ville gje ein hjartestartar til IL Kvernbit og ein til Nordre Holsnøy Idrettslag, fortel Astrid Anne Fjeldstad.

Ho er leiar i LHL Meland. Og Trond Egil Soltvedt, som er dagleg leiar i Meland Aktiv og IL Kvernbit, er svært glad for gåva.

– Me er utruleg takksame. Dette er nok me har snakk om i eit par år at me skulle hatt ein hjartestartar i Meland Aktiv, seier han.

Mange innom

Soltvedt fortel at i Meland Aktiv er det fleire tusen innom i løpet av ei veke. Hallen vert brukt både av skulane, av idrettslaga, av folk som trenar og av eldretrimmen. I tillegg er det mange andre arrangement i hallen, mellom anna store kulturarrangement.

– Me har ikkje hatt bruk for hjartestartar til no, men det kan fort skje, seier Soltvedt.

Både unge og eldre kan få hjartetrøbbel, der startaren kan koma til nytte.

Enkel å bruka

Soltvedt fortel at dei første på huset alt har fått opplæring i bruk av hjartestartaren, og fleire skal koma. Det vil og koma oppslag fleire stader om at der er hjartestartar, og kor han er.

– Og så er startaren ganske enkel å bruka. Han gjev sjølv instruksjonar om korleis ein skal gå fram, fortel Soltvedt. Også i Nordre Holsnøy Idrettslag skal dei ha kurs, fortel leiar Anne Grete Eide.

I første omgang vil hjartestartaren verta plassert i ballhuset deira, men når det nye klubbhuset i Leirdalen står klart neste år, vil han verta plassert der. Det vil også verta lagt ut informasjon om hjartestartaren på Frivilligsentralen sine nettsider.

Loddpengar

Kvar hjartestartar kostar rundt 20.000 kroner, og Fjeldstad og Anne Marie Skurtveit frå LHL Meland fortel at det først og fremst er inntektene frå basaren i oktober som har skaffa pengar til hjartestartarane.

LHL Meland har gjeve pengar til mange gode føremål opp gjennom åra, som sjukeheimen, legekontoret og fysioterapien. Etter det dei veit, er dette det første hjartestartarane som er utplasserte i Meland. Etter dramaet i Sogndal, der ein Brann-spelar fekk hjartestans, har det vore sagt at alle idrettsanlegg bør ha hjartestartar, og det får dei no i Meland.