Glad for første løyving til Sletta-senter

Helst ville styremedlem Asbjørn Ystebø sett spaden i jorda med det aller første.

? Men det er klart ein må innsjå realismen når fylkesutvalet tilrår ein million til eit prosjekt som skal kosta kring 25 millionar kroner. Så eg vil ikkje våga meg ut på noko tips om når tid me kan setja spaden i jorda, seier Asbjørn Ystebø.

Tysdag kveld kunne han likevel gleda sge over at fylkesutvalet i Hordaland tilrår eit tilskot på ein million kroner til det planlagte undervisnings- og utstillingsbygget ved senteret på Sletta.

? Må har hatt kontakt med mange politikarar, og inntrykket er at det er blant anna fylket sin kulturkomité som har gått i bresjen for denne løyvinga, seier Ystebø.

Han peikar som før på at planane på Sletta er avhengige av eit spleiselag der både stat, fylke og kommune tek sine partar av investeringa. Det er dessutan rekna med ein lokal dugnadsinnsats på kring ein million kroner.

? Når det gjeld bidrag frå staten, jobbar me også med det. Me rettar oss mot å få løyving frå såkalla ABM-midlar (Arkiv/bibliotek/Museum) avdi ein stor del av senteret skal få karakter av museum. Håpet er at me kan koma med på statsbudsjettet for 2007. At fylket no går inn, vil vera eit positivt signal overfor både stat og kommune, seier Ystebø til Strilen i går.

Ystebø håpar også heile regionen vil sjå verdien av den planlagte utbygginga på Sletta. Senteret vil og vera eit pluss for distriktet innan reiseliv, påpeikar Ystebø.